اسلام آباد(پاکستان نیوزپوائنٹ 15 اگست2016ء) وزیراعظم محمد نواز شریف دوشنبے آ پاکستان کرکٹ ٹیم نا کیپٹن مصبا ح الحق ءِ ٹیلی فون کرے و اودے اوول اٹی انگلینڈ نا برخلاف آخری ٹیسٹ میچ اٹی ٹیم انا سرسہبی آ مبارکبادی تس۔ وزیراعظم ہاؤس نا بیان نا رداٹ وزیراعظم 70 می آجوئی دے نا وخت آ داتاریخی سرسہبی ءِ مچ آ قوم اکن پاکستان کرکٹ ٹیم نا اسہ ٹیکی اس گوندا۔
اوخاص کر یونس خان و یاسر شاہ نا تاریخی و غیر معمولی کارکڑد نا ستاءِ کرے۔ یونس خان ڈبل سنچری جوڑ کرے و یاسر شاہ 6وکٹ ہلک ہرانا سوب میچ اٹی پاکستانی ٹیم نا پوزیشن سوگو مس۔ وزیراعظم پارے کہ شون و شان ٹیم ورک آ مچ آ ٹیم زبردست تعریف نا حقدار ءِ۔ مصباالحق وزیراعظم تون اظہار تشکر کرے و پارے کہ آجوئی دے آ ٹیسٹ میچ ءِ کٹنگ درحقیقت کل ٹیم انا سرسہبی ءِ۔ اوپارے کہ ننے وزیراعظم و مچ آ قوم نا کنڈآن است بڈی ملنگ آ بھاز خوشی مسنے ہرانا سوب ٹیم انا مورال و جوزہ ءِ پین طاقت ملا۔
