اسلام آباد (پاکستان نیوز پوائنٹ 09 اگست2016ء) پختونخوا ملی عوامی پارٹی نا سروک محمود خان اچکزئی پارینے کہ پارلیمنٹ نا اسیجائی دیوان اس بٹنگسا دہشت گردی نا برخلاف لائحہ عمل اس مرتب کننگے، کوئٹہ ٹی دہشت گردی نا کارروائی جمہوریت ، الس، بنجاو ڈیہہ نا برخلاف سازش اسے، وزیراعظم اودے ٹیسٹ کیس اس جوڑ کے و فرنٹ فٹ آ ہنسا دننگا ملک دژمن عنصر آتا برخلاف کارروائی کے۔
سے شنبے آ قومی اسمبلی نا دیوان اٹی کوئٹہ ٹی دہشت گردی نا واقعہ غا شرہ ٹی بشخ ہلسا محمود خان اچکزئی واقعہ غا ڈکھ و افسوز نا درشانی ءِ کرسا پارے کہ امریکہ کون آ ملک اٹی ہراتم دُنو واقعہ اس مریک تو اودے مچ آامریکہ غا جلہو تکنگک۔ دمدستی وڑاٹ اوجاست وپاست کرسا جلہو گیر آتا پیدواری ءِ کرسا کارروائی کیک۔ اوپارے کہ کوئٹہ 12گلی تا شار اسے ہراڑے ہر گلی ٹی و چوک اٹی سیکورٹی ادارہ غاتا کارندہ غاک ساڑی ءُ۔
اگہ ننے دہشت گردی نا برخلاف داجنگ ءِ کٹوئی ءِ تو غٹ راج دژمن عنصر تا برخلاف کارروائی کروئی مریک۔ ملک انا ہر سیاسی جماعت حکومت ناسپاہی نا وڑاٹ تینا کڑد ءِ ادا کیک۔ اوپارے کہ اگہ پاکستان غٹ آن اول ءِ تو پارلیمنٹ نا اسیجائی دیوان اس بٹنگسا لائحہ عمل اس مرتب کننگے، دننگا کارروائیک جمہوریت، الس ، بنجا و ڈیہہ نا برخلاف سازش ءُ۔ وزیراعظم اودے ٹیسٹ کیس اس جوڑ کے و فرنٹ فٹ آ ہنسا دننگا ملک دژمن عنصر آتا برخلاف کارروائی کے۔ الس نا مخ تفی آن بیدس دہشت گردی نا برخلاف جنگ ءِ کٹنگ مفک۔ اوپارے کہ پارلیمنٹ نا ڈل ہڑزخواہی نا درشانی کن کوئٹہ غا رادہ کننگے۔
