اسلام آباد(پاکستان پوائنٹ نیوز 02 -اگست2016 ء) وزیراعظم محمد نواز شریف توانائی ڈٹ آتیا کاریم نا پیش رفت آ است جمی نا درشانی ءِ کرسا پارے کہ ساڑی آ حکومت توانائی نا کاختی نا مون ءِ توننگ کن متنوع توانائی ڈٹ آتے گچین وڑاٹ کاریم اٹ ہتنگ ءِ۔ اوداہیت ءِ سے شنبے آ وزیراعظم ہاؤس اٹی توانائی نا جاری و بروک آ ڈٹ آتا جاچ دیوان نا کماشی ءِ کرسا پارے۔
وزیراعظم داعزم انا اعادہ ءِ کرے کہ نن تینا مدت نا ایسری اسکان ملک آن لوڈشیڈنگ ءِ چٹفنہ۔ اوپارے کہ دا ہیت است بڈءِ کہ غٹ جاری توانائی ڈٹ آک کم از کم ممکنہ خڑچ آ پورو کننگ انگ ءُ۔ وزیراعظم پاک چین اقتصادی راہداری نا رداٹ توانائی نا ڈٹ آتیا پیش رفت آ خصوصی زورشاغسا داڈٹ آتیا کاریم نا رفتار نا باقاعدگی اٹ جاچ ءِ ہلنگ نا پارت کرے۔ وزیراعظم داہم پارت کرے کہ ملک اٹی غٹ توانائی ڈٹ آتیا عملدرآمد کرسا شفافیت ءِ باوری جوڑ کننگے۔
اوپارے کہ ننا مسخت ملک اٹی توانائی نا کاختی ءِ کم کننگ ءِ ہراکیہی سال آتیان اُرائی و صنعتی صارف آتے زہمی کرینے۔ اوپارے کہ نن صارف آتے نہ صرف وافر بلکن ہڑزان بجلی نا فراوانی کن ہم پرعزم اُن تانکہ او ملک انا راجی و اقتصادی شون اٹی بشخ ہلنگ کیر۔ دیوان اٹی وزیر خزانہ اسحاق ڈار، وزیراعلیٰ پنجاب شہباز شریف، وزیر دیر و بجلی خواجہ محمد آصف، وزیر پٹرولیم شاہد خاقان عباسی، سیکرٹری دیر و بجلی محمد یونس ڈھاگا و ایلو سینئر کمامدارآک شرکت کریر۔
