اسلام آباد(پاکستان نیوز پوائنٹ 08مارچ2017ء) وزیراعظم محمد نواز شریف پارینے کہ پاکستان نا حکومت زند انا ہر بشخ و ہر کہول آ نیاڑی تا جامع شرکت ءِ المی جوڑ کننگ کن کاریم کننگ ءِ، نیاڑیک کاروبار ، آئی ٹی، سائنس و ٹیکنالوجی ، تعلیم و سیاست کون آ بشخ آتیٹی بھلو سرسہبی اس دوئی کرینو و حکومتی کہول آ چندی جہانی تنظیم تیٹی اہم عہدہ غاتیا فائز مسنو۔
داہیت ءِ او نیاڑی تا جہانی دے انا وخت آ تینا کلہو اٹی پارے۔ وزیراعظم پارے کہ نن غٹ جہانی برادری تون اواری اٹ نیاڑی تا جہانی دے ءِ اڈتننگ اُن۔ دادے انا سرحال چینجنگ ورلڈ آف ورک، کرہ ارض 2030 ء اسکان 50-50ءِ۔ وزیراعظم صنفی بریبری، نیاڑی تے بااختیار جوڑ کننگ و انسانی حق انا پوسکن آ ساڑی آ پڑو تیا موثر عملدرآمد کن 2030ء نا ایجنڈا آ ترندی اٹ کاریم کننگ نا گرج آ زور شاغا۔
اوپارے کہ آئین پاکستان نیاڑی تے بیریبر حیثیت ایتک، آرٹیکل 18 نا رداٹ نیاڑی تے ہر پیشہ ٹی اوارمننگ نا حق تننگانے وخت اس کہ آرٹیکل 25اٹی بریبری و غیر امتیازی سلوک آ زور شاغنگانے۔ اوپارے کہ پاکستان نیاڑی تا شونداری کن جہانی عزم انا بابت پوروی وڑاٹ عمل کننگ ءِ حکومت پاکستان انسانی حق انا ہفت بنداوی کنونشن ءِ پک کرے ہراٹی نیاڑی تا برخلاف ہر وڑنا امتیاز آتا چٹفنگ نا کنونشن ہم اوار ءِ۔
اوپارے کہ نیاڑی تے راج انا گرانقدر و مفید باسک جوڑ کننگ کن ہر کہول آ اوفتا اوار مننگ اسہ قومی زمواری اسے۔ حکومت پاکستان نیاڑی تا بابت انسانی حق انااہم اولیتی بشخ آتیا کاریم کننگ ءِ ہراٹی صنفی بنداو آ بیدادی نا چٹفنگ ، نیاڑی تا برخلاف غٹ امتیازی کانود سازی نا چٹفنگ نا جاچ ، پوسکن ءُ کرائسزسنٹر تا اڈتننگ وضلعی ، صوبائی و بنجائی کہول آ اوفتا شرحالی کن ساڑی خذمت آتے سوگو جوڑ کننگ اوار ءِ۔
اوپارے کہ جمہوری اقدار ءِ سوگو جوڑ کننگ کن ننا حکومت لس گچین کاری تیٹی نیاڑی تا شرکت اٹی ودکی نا عزم کرینے ہراڑآن نئے بیرہ السی نمائندگی ٹی ودکی مریک بلکن ورنانسل اٹی ووٹنگ کلچر ءِ ہم مون آ دننگک۔ اوپارے کہ حکومت چندی اہم گام گیج کرینے ہرافتے ٹی پالیسی بدلی، کانودی اصلاحات ، انصاف اسکان رسینگ، نیاڑی ، چنا اقلیت و نزور تپہ غاتا رکھ اوار ءِ۔
اوپارے کہ 18 می آئینی ترمیم نا رداٹ صوبائی حکومت آتا زمواری ءِ کہ او نیاڑی تا حق انا رکھ و مون آ دننگ کن ہروڑنا کوشست کیر، بنجائی حکومت دا چرجوئی ٹی پورو کمک کیک۔ اوسول سوسائٹی، مخیر خواجہ و میڈیا و کارپوریٹ سیکٹر تون اوار غٹ تعلقدار حلقہ غاتیا زور شاغا کہ او نیاڑی تے کن اسہ گچین و رکھوک چاگڑد اسے نا فراوانی کن حکومتی کوشست آتیٹی کمکاری ءِ برجاتخر۔
