اسلام آباد(پاکستان نیوز پوائنٹ 28فروری2016ء) دفترخارجہ نا ترجمان محمد نفیس ذکریا پارینے کہ پاکستان جغرافیائی لحاظ اٹ سویلی، نیامی و دیکی ایشیانا سنگم آ واقع ءِ و ای سی او نا باسک ملک آتے ڈیہہ نا بے پناہ قدرتی وسیلہ غاتیان مستفید کرفنگ اٹی اہم کڑد ادا کننگ کیک۔ دا ہیت ءِ دفترخارجہ نا ترجمان محمدنفیس ذکریا سے شنبے نا دے اے پی پی تون ہیت وگپ کرسا پارے۔
ترجمان پارے کہ بے پناہ وسیلہ و انسانی سرمایہ آن مالامال ڈیہہ ٹی شونداری نا بھلو لائخی اس ساڑی ءِ و پاکستان ای سی او و باسک مک آتے داڑآن مستفید کرفنگ اٹی اہم کڑد ادا کننگ کیک۔ اوپارے کہ 13می ای سی او سروک و 22می وزراء خارجہ کونسل نا دیوان اڈتننگ نا وخت بے کچ اہمیت تخک۔ ترجمان پارے کہ غٹ باسک ملک آک دا ڈیہہ نا لائخی تیان جوان وڑاٹ بلد ءِ و شونداری نا ہدف آتا اسیجائی دوئی کن تینا توانائی تے خڑچ کننگ آ چکار کننگ ءِ۔
اوغانستان و ایران تون تعلقداری تا بابت اسہ سوج اسے نا ورندی ءِ ترسا ترجمان پارے کہ ہڑتوم آ ہمسایہ ملک آتون پت انا ہچ ءُ کمتی اس اف و پاکستان نا اوڑتون دوستانہ و برادرانہ تعلقداریک ءُ۔ ترجمان پارے کہ گڑاس دہشت گرد عنصراوغانستان نا گل زمین ءِ کاریم اٹ اتسا پاکستان اٹی تخریبی سرجزکننگ ءُ۔ ترجمان اوغانستان تون بارڈر مینجمنٹ نا گرج آ زورشاغا۔ اوپارے کہ دہشت گردی پاکستان و اوغانستان نا اسیجائی دشمن ءِ۔ پاک ایران گیس پیپ لین اٹی تاخیر نا بابت ترجمان پارے کہ گڑاس تکنیکی سوب آتا بناآ ڈٹ تاخیر نا گواچی ءِ و داپت انا درشانی ءِ کرے کہ دامعاملہ زوت ایسر مریک۔
