اسلام آباد(پاکستان نیوز پوائنٹ 28فروری2016ء) وزیراعظم نا خصوصی کمکار خارجہ امور طارق فاطمی تون چین نا ایگزیکٹو نائب وزیر خارجہ ژانگ یسوئی سے شنبے آ داڑے اوڑدہی کرے و پاک چین تعلقداری ، ای سی او سروک دیوان و علاقائی حالیت آتیان بابت معاملہ غاتیا خیال آتا درشانی ءِ کریر۔ دفترخارجہ نا ترجمان نا رداٹ ژانگ یسوئی چین نا نمائندہ نا حیثیت اٹ ای سی او سروک دیوان اٹی بشخ ہلنگ نا غرض اٹ پاکستان نا دورہ ءِ کننگ ءِ۔
خصوصی کمکار پارے کہ چین اتون سنگتی پاکستانی خارجہ پالیسی نا بنداو ءِ۔ اوپاکستان اٹی ساڑی دہشت گرد جلہو آتارداٹ چین نا پبی مخ تفی و کمکاری آ چین نا عہدیدار آتا منت واری ءِ ادا کرے۔ اوڑدہی ٹی غٹ بشخ آتیٹی ہڑتوم آ کنڈآتا تعلقداری تیٹی پدریسہ پیش رفت آ است جمی نا درشانی ءِ کننگا و اقتصادی رشتہ غاتے پین زیات کننگ ، سلامتی نا بشخ اٹی کمکاری ءِ ودفنگ و سیاسی تعلقداری تے پین سوگو کننگ نا عزم ظاہر کننگا۔
ژانگ یسوئی ای سی او سروک دیوان اٹی بشخ ہلنگ کن خصوصی سلہ تننگ آ تینا حکومت نا کنڈآن منت واری ءِ ادا کرے و سروک دیوان نا سرسہب اڈتننگ آ پاکستان ءِ مبارکبادی تس ۔ اوداعزم انا اعادہ ءِ کریر کہ چین پاکستان تون تینا تعلقداری تے بھاز اہمیت ایتک و پاکستان نا وت واجہی ، آجوئی و علاقائی سالمیت نا پورو مخ تفی ءِ کیک۔
