اسلام آباد(پاکستان نیوز پوائنٹ 23فروری2016ء) دفتر خارجہ نا ترجمان پارے کہ دہشت گردی پاکستان و اوغانستان نا اسیجائی دشمن ءِ و ہڑتوم آ ملک آک داڑآن زہمی مننگ ءُ۔ سیم انا ہڑتوم آ کنڈآتیا دہشت گرد آتا ہن و بر ءِ توننگ کن گچین بارڈر مینجمنٹ المی ءِ۔ دوبہ خلنگ ہچ ءُ ویل اسے نا ایسری اف۔ دشمنک اوغانستان نا تہہ نا حالیت آتون فائدہ ہرفسا اوغان گل زمین ءِ پاکستان اٹی دہشت گرد جلہو آتے کن کاریم اٹ اتنگ ءِ۔
اسہ سروک دیوان اسے ٹی بڑزکو کہول آ غٹ باسک ملک آک شرکت ءِ پک کرینو۔ دیوان یکم مارچ آ اسلام آباد اٹی بناء کننگ ءِ۔ سروک دیوان آن مست باسک ملک آتا وزیر خارجہ غاک و سینئر کمامدارآتا دیوان اس اڈ ہلک۔ دفترخارجہ نا ترجمان محمد نفیس زکریا پنچ شنبے آ ہفتہ وار بریفنگ اٹی صحافی تا جتا سوج آتا ورندی ءِ ترسا پارے کہ حکومت دہشت گرد آتون مون تننگ کن ٹھوس گام گیج کننگ ءِ ۔
داچرجوئی ٹی وزیراعظم پورو واک اتون دہشت گرد آتون مون تننگ نا پارت جاری کرینے۔ اوغانستان نا بابت اسہ سوج اسے نا ورندی ءِ ترسا ترجمان پارے کہ دہشت گردی پاکستان و اوغانستان نا اسیجائی دشمن ءِ و ہڑتوم آ ملک داڑآن زہمی مننگ ءُ۔ اوپارے کہ سیم انا ہڑتوم آ کنڈآتیا دہشت گرد آتا ہن و بر ءِ توننگ موثر بارڈر مینجمنٹ المی ءِ۔ پاکستان اوغانستان اٹی امن و سوگوی کن پرعزم ءِ۔
ترجمان اوغانستان اٹی دائمی امن کن چار کڑدہ ہی رابطہ رڑاٹی اواری اٹ کاریم کننگ آ زور شاغا۔ اوپارے کہ اوغانستان و پاکستان نا نیام اٹ معاملہ غاک جوڑ جاڑی و مثبت گام گیج آتیان ایسر کننگ نا گرج ءِ۔ دہشت گردی نا ساڑی واقعہ غاتیٹی بھارت نا اوار مننگ نا بابت اسہ سوج انا ورندی ءِ ترسا ترجمان پارے کہ تعلقدار کمامدار جاست وپاست کننگ ءُ ولے پاکستان اٹی دہشت گردی نا واقعہ و دہشت گرد آتا مالی کمک نا فراوانی ٹی بھارت نا اوار مننگ نا ہیت داسہ ہچ آن ڈکوک متنے۔
ترجمان پار ے کہ بھارت ءِ احساس کروئی مریک کہ ڈیہہ ٹی امن و سوگوی تینٹ اونا گچین فائدہ ٹی ءِ۔ کشمیر نا بابت اسہ سوج اسے نا ورندی ءِ ترسا ترجمان پارے کہ مچ آ پاکستانی قوم کشمیری الس نا حق خودارادیت نا دوئی کن جہد نا مخ تفی ءِ کیک۔ حکومت اوفتا سیاسی ، اخلاقی و سفارتی مخ تفی ءِ برجاتخک۔
