لاہور(پاکستان نیوز پوائنٹ 23فروری2016ء) صوبائی دارالحکومت لاہور نا پوش ایریاڈیفنس زیڈ بلاک نا کمرشل مارکیٹ اٹی بمب دھماکہ ٹی 5 بندغ تپاخت وخت اس کہ 21 ٹھپی مسر۔ سرجم احوال نا رداٹ ڈیفنس زیڈ بلاک کمرشل مارکیٹ اٹی پنچ شنبے آ نیمروچ آ اناگت زورداردھماکہ مس ہراڑآن خڑک انا ماڑی تا شیشہ غاک پنار، و دھماکہ نا خڑک سلوک گاڈی وموٹرسائیکل آتے ہم بھاز نسخان رسینگا۔
دھماکہ نا دمدستی احوال آ ریسکیو ٹیم آتون اوار ایدھی ایمبولینس و ایلو امداردی ٹیمک ہم موقع غا سرمسر ہراک دھماکہ ٹی ٹھپی مروک آ 13 بندغ نیشنل ہسپتال ڈیفنس وخت اس کہ 15 ٹھپی تے جنرل ہسپتال لاہور و پنچ بندغ نا لاش آتے ہم جنرل ہسپتال گدریفیر، دھماکہ نا دمدستی گڈ ڈی جی ریسکیو 1122 ڈاکٹر رضوان نصیر، ڈی سی او لاہور سمیر احمد و پولیس افسر آک جاگہ غا سرمسر، ڈاکٹر رضوان نصیر میڈیا تون ہیت وگپ کرسا پارے کہ دھماکہ ٹی تپاخت کروک و ٹھپی مروک آ غٹ بندغ آتے نیشنل ہسپتال ڈیفنس و جنرل ہسپتال لاہور آ گدریفنگانے و ریسکیو آپریشن ءِ پورو کننگانے، صوبائی وزیر جان جوڑی خواجہ سلمان رفیق ہم نیشنل ہسپتال ڈیفنس نا دورہ ءِ کرے و ہموڑے درمان مروک آ ٹھپی تا جان پڑسی و ہسپتال انتظامیہ ءِ ٹھپی تا درمان کن گچین آسراتی فراوان کننگ نا پارت کرے۔
داوخت آ اومیڈیا ءِ پارے کہ دھماکہ ٹی مروک آٹھپی تے گچین درمان نا آسراتی فراوان کننگ انگ ءِ و ننکن دا آزمائش نا وخت اسے، ہم بایدے غٹ اسٹ مرین تانکہ دہشت گردی نا خاتمہ ءِ کننگ مرے، داکان مست فرانزک و بمب ڈسپوزل سکواڈ نا ٹیمک زیڈ بلاک شکست نا جاگہ نا دورہ ءِ ہم کریر و ہموڑے شاہدی یکجا کرسا جاست وپاست نا بناءِ کرینو۔
