اسلام آباد (پاکستان پوائنٹ نیوز۔ یکم اگست۔2016ء) برطانوی ادارہ بی ایم آئی نا رداٹ پاکستان دنیا نا 10می مون آ بروک آ معیشت آتیٹی اوڑدہ ءِ۔ برطانوی ریسرچ ادارہ نا کنڈآن دنو دہ ملک آتا فہرست جاری کننگانے ہرابروک آ دہ سال آتیٹی ترندی اٹ مون آ ہِننگ نا لائخی تخرہ دا ملک آتیٹی پاکستان، بنگلہ دیش، مصر، ایتھوپیا، انڈونیشیا، کینیا، نائجیریا، فلپائن، ویتنام و میانمار اوڑدہ ءُ۔
رپورٹ اٹی پاننگانے کہ بروک آ وخت آتیٹی پاکستان پیداواری بنجانا وڑاٹ مون آ بریک۔ پاکستان اٹی جوڑجاڑی و پیداواری بشخ ہرافتے ٹی ٹیکسٹائل و کارسازی نا بشخ شون ہلسا نظر بننگ ءِ۔ ہڑزان توانائی نا بشخ اٹی پاکستان نا ہندی پیداواری بشخ آتے غٹ آن زیات سرسہبی دوئی مریک۔ ادارہ نا رداٹ ہنداملک آک 2025ء اسکان جہانی معاشی پیداوار اٹی 4کھرب30ارب ڈالر نا حصہ دار مریرہ۔ داملک آتا غٹ آن زیات شون پیداواری و جوڑجاڑی صنعت ءِ مریک۔ پاکستان، میانماو بنگلہ دیش اٹی پوسکنا جوڑجاڑی زون اس جوڑ مننگ ءِ و زیات شون جوڑجاڑی بشخ آتیٹی نظر بریک شاری آبادی تیٹی دے پہ دے ودکی مریک ہرانا نتیجہ ٹی پیداواری بشخ آتے عروج ملک۔
