کوئٹہ، سریاب روڈ آ سم کاری ، 2بندغ تپاخت کریر

کوئٹہ (پاکستان پوائنٹ نیوز۔ یکم اگست۔2016ء) کوئٹہ نا سریاب روڈ آ نادرست سلہہ بند موٹرسائیکل سوارآک رکشہ سیا سم کاری کرسا اِرا بندغ نا خون ءِ کریر۔ پولیس نا رداٹ دوشنبے نا دے کوئٹہ نا علاقہ سریاب روڈ ڈگری کالج نا خڑک آ نادرست سلہہ بند موٹرسائیکل سوارآک اناگت رکشہ اسیا سم کاری کریر ہرانا نتیجہ ٹی محمد نبی و غلام نبی موقع غا تپاخت کریر۔ تپاخت کروک آ بندغ آتا تعلق ہزارہ کمیونٹی آن پاننگانے ، پولیس ءِ احوال ملنگ تون موقع نا جاگہ غا سرمرسا لاش آتے دمدستی وڑاٹ سول ہسپتال آ گدریفیر ہراڑے المی کارروائی آن گڈ لاش تے اوفتا وارث آتا حوالہ کریر۔ پولیس علاقہ نا ناکہ بندی ءِ کرسا دوبہ دارآتا پٹنگ نا بناءِ کرینو۔