اسلام آباد (پاکستان پوائنٹ نیوز۔ یکم اگست۔2016ء) بنجائی وزیر ڈٹ بندی و شون و اصلاحات احسن اقبال پارینے کہ سرسہب انسان تہاری ٹی روشنائی نا روشنی ءِ پٹنگ نا لائخی تخک ، وخت انا اہم گرج ورناتیٹی لیڈرشپ اسکلز ودی کروئی ءِ ، علم و پٹ و پول نا روایت آن مری مسلم دنیا نا زبوں حالی نا سوب ءِ ، آخبت اٹی جنگ آک علم انا پٹ اٹی مریرہ ، 2013ء نا مقابلہ ٹی اینو نا پاکستان اٹی بدلی بسنے۔
دوشنبے آ داخیال آتادرشانی ءِ او بین الاقوامی یوتھ کانفرنس آن تران کرسا کرے ۔ بنجائی وزیر پارے کہ ورنا تا مایوسی ءِ چٹفسا مثبت سوچ ودی کننگ نا گرج ءِ ، اینو نادور علمی انقلاب نا دور ءِ ہراڑآن معیشت سوگو مننگ کیک۔ اوپارے کہ وخت انا اہم گرج ورناتیٹی لیڈرشپ سکلز ودی کروئی ءِ ، سرسہب انسان تہاری تیٹی روشنائی نا روشنی ءِ پٹنگ نا لائخی تخک ، ورناتا مایوسی ءِ چٹفسا مثبت سوچ ودی کننگ نا گرج ءِ ۔
اوپارے کہ اینو نا دور علمی انقلاب نا دور ءِ ہراڑآن معیشت بھاز سوگو مننگ کیک، وسیلہ غاتا کم مننگ نا باوجود پاکستانی ورناک گچین کاریم کننگ ءُ۔ احسن اقبال پارے کہ گچین و روشناآخبت کن علمی دنیا ٹی لیڈرشپ ودی کروئی مریک ، علم و ایجادات آتا تہہ ٹی ایلو قوم تا مقابلہ ءِ کننگ نا فکر ودی کروئی مریک ، پوسکنا دنیا ٹی جنگ سلہہ غاتازورآآخا بلکن علم انا زور آ مننگ ءِ ۔
اوپارے کہ پاکستان نا ورناک آئی ٹی نا دنیا ٹی اہم کڑد ادا کننگ ءُ ، پاکستان داسا دہشت گرد آتا آماجگاہ اف بلکن دنیا نا دہ میکو مون آ بروک آ معاشی واک ءِ ۔ بنجائی وزیر پارے کہ پاکستان اٹی ٹیلی کمیونیکیشن انفراسٹرکچر دنیا نا مقابلہ ءِ کننگ کیک، شون صرف ماڑی تا جوڑ کننگ ناپن اف بلکن اصل شون انسان نا شون ءِ۔ اوپارے کہ لیڈرشپ اسہ مشن اسینا پن ءِ ہراانسان نا زند اٹی ہچ ءُ مثبت مشن اس اف او سرسہب مننگ کپک ، سہدار و انسان اٹی پرخ صرف سوچ انا پرخ ءِ ، انسان نا سوچ ہمیش بھلن مریک۔
