اسلام آباد(پاکستان نیوز پوائنٹ 21فروری2016ء) وزیراعظم محمد نواز شریف (اینو) چارشنبے آ ترکی نا 3 دے ئی دورہ غا رادہ مریک۔ وزیراعظم پاکستان ترکی نا بڑزکو کہولی سٹریٹجک کمکار کونسل (ایچ ایل ایس سی سی ) نا پنچ می دیوان اٹی بشخ ہلیک۔کیہی بنجائی وزیر آک و بڑزکو کمامدارآتیا تالان بڑزکو کہولی ڈل ہم وزیراعظم تون اوار مریک۔ دورہ ٹی وزیراعظم جتا ہڑتوم آ کنڈآتا علاقائی و جہانی معاملہ غاتیا ترک سروک آتون وسیع تر صلابت و خیال آتا درشانی ءِ کیک۔
وزیراعظم محمد نواز شریف ترک وزیراعظم بن علی یلدرم تون اوار پنچ شنبے آ انقرہ ٹی پاک ترک بڑزکو کہولی اسٹریٹجک کمکار کونسل نا پنچ می دیوان نا اسیجائی کماشی ءِ ہم کیرہ۔ پاک ترک بڑزکو کہولی کمکار کونسل نا اڈتننگ 2009 ء ٹی ہڑتوم آ ملک آتا نیام اٹ بڑزکو سیاسی کہول آ صلابت کن فریم ورک نا وڑاٹ عمل اٹی اتنگا۔ دا میکنزم ہڑتوم آ کنڈآتا سروک آتے سٹریٹجک فوکس و راہشونی فراوان کننگ و آخبت کن اسہ وژن اس ترتیب تننگ اٹی کمکاری کیک۔
کونسل نا رداٹ 6اسیجائی ورکنگ گروپ آک کاریم کننگ ءُ ہرافتے ٹی واپار، توانائی ، بینکنگ و فنانس، مواصلات ، ریلوے ، تعلیم و دودوربیدہ و سیل و سوات نا بشخ آک اوار ءُ۔ کونسل نا دسمبر 2010ء ، مئی 2012ء، ستمبر 2013ء و فروری 2015ء ٹی چار دیوان اڈ ہلکونے۔ آخریکو دیوان 17 فروری 2015ء آ اسلام آباد اٹی اڈ ہلکوسس۔ کونسل نا فریم ورک نا رداٹ ہڑتوم آ ملک آتا نیام اٹ 50 آن زیات معاہدہ و مفاہمت نا یات داشت آتے گڈیکو دروشم تننگانے۔
کونسل نا پنچ می دیوان نا ایسری آ اسہ اسیجائی اعلامیہ اس جاری کننگک وخت اس کہ داوخت آ کیہی معاہدہ و مفاہمتی یات داشت آتیا دستخط نا ہم اومیت ارے۔ دورہ ٹی وزیراعظم محمد نواز شریف ترک صدر رجب طیب اردوان تون ہم اوڑدہی کیک۔ وزیراعظم محمد نواز شریف 15جولائی 2016ء آ ترکی ٹی بے سہب بغاوت نا برخلاف پاکستان نا حکومت و الس نا کنڈآن یکجہتی و غیر متزلزل مخ تفی نا عزم انا درشانی ءِ کننگ کن ترک پارلیمان نا دورہ ءِ ہم کیک۔
بغاوت نا نن ترک پارلیمان ءِ بمباری نا نشانہ جوڑ کننگاسس۔ وزیراعظم محمدنواز شریف ترکی ٹی جمہوریت نا دفاع کن تینا جان تے ندر کروک آتے خراج عقیدت ہم پیش کیک۔ پاکستان و ترکی نا نیام اٹ تعلقداری ریاست آتا نیام اٹ تعلقداری نا بابت انفرادی حیثیت تخک ہرا غیر معمولی گرم جوشی و تین پہ تینی پت آ استوار ءِ۔ دا برادرانہ تعلقداری نا بنداو اسیجائی عقیدہ ، تاریخ، دودوربیدہ و زبان تیٹی تعلق آ ٹی ءِ۔
ہڑتوم آ قومک کشمیر و قبرص تون اوار تینا قومی مسخت آتے کن اسہ ایلو تون تین پہ تینی کمک کرسا کرینو۔ پاکستان و ترکی نا نیام اٹ ہڑتوم آ کنڈآتا تعلقداری ءِ ساڑی آ سال تیٹی اسہ پوسکن ءُ جہت و فروغ اس ملانے و دا تعلقداری تا دنگ اقتصادی تعلقداری آن ہلیس دفاعی کمکاری و تعلیمی و دودوربیدہ ہی رابطہ غاتا مون آ دننگ اسکان بھلن مسنے۔ ہڑتوم آ کنڈآتا واپار، زرکاری و واپاری کمکاری ءِ مون آ درسا تینا اقتصادی شریداری ءِ پین گچین جوڑ کننگ کن کوشست کننگ ءِ۔
ہڑتوم آ ملک آتا سروک آک 21می صدی نا حق آتے مون آ تخسا تینا تاریخی تعلقداری تے اسہ سوگو ءُ اسٹریٹجک شریداری اسے ٹی بدلیفنگ نا عزم تخک۔ اینخو سال پاکستان و ترکی نا سفارتی تعلقداری نا 70می سال دے ہم اڈتننگ انگ ءِ و داچرجوئی ٹی ہڑتوم آ ملک آک بھاز انگا خصوصی پروگرام و دود اڈتننگ ءُ۔ وزیراعظم محمد نواز شریف نا دورہ ترکی و پاک ترک بڑزکو کہولی سٹریٹجک کمکارکونسل نا پنچ می دیوان اٹی بشخ ہلنگ آن ہڑتوم آ برادر ملک آتا نیام اٹ تاریخی و آزموندہ تعلقداری تے پین مون آ دننگ رسینگک و ہڑتوم آ ملک آتانیام اٹ کیہی بشخ آتیٹی تعلقداریک پین سوگو مریرہ۔
