ماسکو(پاکستان نیوزپوائنٹ 26مارچ2018ء) روسی حکام سائبیریا دے شہر کیمیروو دے ہک شاپنگ سینٹر اچ بھاہ لگ گی جیں پاروں 37 لوکاں دے مرنڑ دی تصدیق کیتی اے ۔روسی میڈیا آکھیے جو گھٹ توں گھٹ 69بندے حالی تئیں لا پتہ ہن جیں اچ ڈو سال توں 17سال تئیں دے 41بال وی شامل ہن ۔ڈسایا گے جو بھاہ لگنڑ دی ابتدا چیری کمپلیکس ناں دے ہک شاپنگ سنٹر دی اتلے منزل توں تھی ۔
ایں وقت ایں شاپنگ سنٹر اچ قائم سینماہال اچ بہوں سارے لوک فلم ڈیکھدے پے ہن ۔سوشل میڈیا تے پوسٹ کیتی ونجنڑ آلی ویڈیوز اچ لوکاں کوں کھڑیاں توں بھجدے ہوئے ڈٹھا گے ۔کھڑیاں توں دھواں نظر آندا پے جڈاں جو بھاہ تے قابو پاونڑ آلے عملے شاپنگ کمپلیکس کوں خالی کراونڑ اچ سرگرم ہن ۔کیمیرو دے نائب گورنر ولادیمیر چیرنو آکھیے جو ہک سینما ہال توں 13لاشاں ملیاں ہن جڈاں جو ایمر جنسی سروس تقریبا 100لوکاں کوں عمارت توں کڈھیے ۔بھاہ لگنڑ دی وجہ حالی تئیں پتہ نی لگ سگی جڈاں جو حکام تفتیش دا حکم جاری کر ڈتے ۔آسٹریا دے چانسلر تے لاتویا دے وزیر خارجہ بھاہ لگنڑ اچ ہلاک تھیونڑ آلیں دے ٹبر نال تعزیت کیتی اے ۔
