مکہ مکرمہ (پاکستان نیوز پوائنٹ 07ستمبر 2016ء) مکہ مکرمہ پولیس دے ڈائریکٹر میجر جنرل سعید القرنی آکھیا ہے جو ہنڑ تئیں مختلف چیک پوسٹاں توں ہک لکھ 88 ہزار 747 غیر مجاز بندیاں کوں واپس بھیجیا گئے۔ میڈیا رپورٹس دے مطابق انہاں بندیاں حج دے اجازت ناماں دے بغیر مکہ مکرمہ وچ حج سانگے وڑن دی کوشش کیتی ہائی۔میجر جنرل سعید القرنی ڈسایا جو 84965 گاڈیاں غیر قنونی طور تے مکہ وچ وڑن دی کوشش کیتی پر انہاں کوں شہر وچ داخل ہونڑ توں روک ڈتا گیا۔
ایندے علاوہ غیرقنونی طور تے اتے کہیں قسم دیاں دستاویزات دے بغیر حج سانگے بندیاں کوں گھن آونڑ آلیاں 48 منی بساں کوں ضبط کر گھدا گئے۔سعید القرنی ڈسایا جو معمول دے معائنے دیاں کارروائیاں دے دوران 22 جعلی حج مہماں دا سراغ لاتا گئے ۔ان دا آکھنڑ ہا جو مکہ مکرمہ دے آسے پاسے حج سانگے غیر قنونی طور تے آونڑ آلے بندیاں کوں روکنے سانگے 109 سکیورٹی چیک پوسٹاںقائم کیتیاں گئیاں ہن۔
