جدہ دے ہوائی اڈے تے ہک کروڑ عمرہ زائرین دی آمد و رفت سانگے انتظامات پورے کر گھدے ہن

جدہ(پاکستان نیوزپوائنٹ24اکتوبر2017ء) سعودی عرب دے ساحلی شہر جدہ دے شاہ عبدالعزیز بین الاقوامی ہوائی اڈے تے آندے عمرہ سیزن دے دوران ہک کروڑ توں ودھ زائرین دی آمد و رفت سانگے سارے انتظامات پورے کر گھدے ہن ۔العربیہ ٹی وی دے مطابق نویں عمرہ سیزن دا گزریل ہفتے آغاز تھیا ہے تے اے 18 شوال 1439 ہجری ( 2جولائی 2018ء)تئیں جاری رہ ویسی ۔ایں ہوائی اڈے تے ہک گھنٹے اچ آونڑ آلے مسافر1800 تے باہرلے ملک روانہ تھیونڑ آلے 1700 مسافراں کوں رکھنڑ دی گنجائش موجود ہے ۔انتظامیہ دا آکھنڑ ہے جو ہوائی اڈے تے دنیا اچوں آونڑ آلے زائرین کوں 27سرکاری تے نجی محکمے مختلف نوعیت دی خدمات ڈیسن ۔ایں ہوائی اڈے دے تاج ٹرمینل دا کل رقبہ 5لکھ 10ہزار مربع میٹر ہے ۔