امریکی صدر روس دے خلاف پابندیاں دے بل تے دستخط کر ڈتے

واشنگٹن (پاکستان نیوزپوائنٹ 3اگست2017ء) امریکادے صدر ڈونلڈ ٹرمپ کانگریس ولوں منظور کردہ روس دے خلاف پابندیاں دے بل تے دستخط کر ڈتے ہن ۔ امریکی ذرائع ابلاغ دے مطابق روس دے خلاف بل تے امریکی صدر دے دستخط دے بعد اے مسودہ ہنڑ باقاعدہ قانون بنڑ گیا ہے۔ روس دے خلاف امریکی کانگریس اے پابندیاں گزریل امریکی صدارتی انتخابات اچ ماسکو ولوں مبینہ مداخلت پاروں لاتیاں ہن ۔بل دی منظوری دے بعد اے واضح تھی گیا ہے صدر ٹرمپ روس بارے اچ کوئی نرم گوشہ کائنی رکھیندے ۔بل دی منظوری دے بعد صدر ٹرمپ ہک بیان اچ آکھیا انہاں ایں بل تے دستخط تاں کر ڈتے ہن لیکن ایں نویاں قانون اچ کئی خامیاں ہن ۔