لاہور(پاکستان پوائنٹ نیوز06۔دسمبر2017ء) لندن دے میئر صادق خان نے آکھیا اے کہ دہشت گردی خلاف سانوں اک پلیٹ فارم اُتے رلکے لڑنا پئے گا، میرے ماں پیو پاکستانی نیں تے مینوں پاکستانی ہون اُتے فخر اے، پاکستان وچ بہت ترقی ہوئی، عمران خان نے میرے خلاف انتخابی مہم وچ حصہ لیا، منفی مہم نوں لوکائی نے رد کر دتا۔
اوہناں نے اج الحمراء ہال لاہور وچ اپنے اعزاز وچ ہون والی تقریب نال خطاب کردے ہوئے آکھیا کہ میرے ماں پیو پاکستانی نیں تے مینوں پاکستانی ہون اُتے فخر اے، کیونکہ ایہ میرے ماں پیو دا دیس اے۔
مینوں برطانیہ اُتے وی فخر اے جتھے لوکاں نوں ونڈیا نہیں گیا۔ برطانیہ وچ اک مسلمان وی وزیر اعظم بن سکدا اے۔ صادق خان نے آکھیا کہ پاکستان وچ ترقی
ہوئی اے۔
عالمی مارکیٹ وچ پاکستانی دا مستقبل بہت بہتر اے۔ لندن سنے دنیا بھر وچ پاکستان معاشی منڈی وچ بہتر تھاں بنا سکدا اے۔
اوہناں نے آکھیا کہ برطانیہ وچ بیرونی سرمایہ کاراں لئی بوہے کھول دتے نیں۔ جدکہ ہنر مند بندیاں نوں ترجیحی بنیاداں اُتے ویزے وی دے رہے آں۔
اوہناں نے آکھیا کہ پاکستان اک عظیم ملک اے تے ایتھوں دے لوکاں وچ بڑی صلاحیت اے۔ لاہور وچ شاندار استقبال تے لوکائی ولوں ملن والی عزت اُتے مشکور آں۔
میئر لندن نے آکھیا کہ عمران خان نے میرے خلاف انتخابی مہم وچ حصہ لیا ایہ اوہناں دی چوائس سی۔ میرے خلاف منفی مہم چلائی گئی پر لوکائی نے اوہنوں رد کر دتا کیونکہ اوہدے وچ لوکائی نوں ونڈن دی گل کیتی گئی سی۔