جیالے قسم کھان! ملک نوں اجیہی ریاست بناواں گے کہ لوکائی ای اصل حکمران ہوئے: بلاول بھٹو

اسلام آ باد(پاکستان پوائنٹ نیوز05۔دسمبر2017ء) پاکستان پیپلز پارٹی دے چیئرمین بلاول بھٹو زرداری نے جیالاں توں عہد لیا اے کہ قسم کھاؤ!اسیں ملک نوں اجیہی ریاست بناواں گے کہ لوکائی ای حکمران ہوئے ، اسلام دہشت گردی تے فرقہ واریت نوں رد کردا اے، ریاست دی رٹ تے قانون دی حکمرانی قائم کراں گے، جمہوریت ای ملک نوں اک کر سکدی اے، نہیں چاہندے الیکشن ملتوی ہون، آصف زرداری نے سی پیک دی نینہ رکھی تے آئین بحال کیتا۔

اوہناں نے اج پریڈ گراؤنڈ وچ پیپلز پارٹی دے 50ویں تاسیس دیہاڑ دے موقعے اُتے جلسے نال خطاب کردے ہوئے آکھیا کہ اج پیپلز پارٹی دا 50واں تاسیس دیہاڑمنایا جا رہیا اے۔

اوہناں دا کہنا سی کہ جدوں آمریت مسلط کیتی تے پیپلز پارٹی نے بغاوت دا جھنڈا اُچا کیتا۔ پیپلز پارٹی دی اک تاریخ اے۔

اوہناں نے آکھیا کہ 1970دے انتخابات مگروں ملک نویں تجربے توں لنگھیا۔آمراں

دے تجربیاں نال مشرقی تے مغربی پاکستان وچ پندھ ودھ گیا۔

جدوں آمراں توں پاکستان نہ سنبھالیا گیا تے فیر پاکستان نوں ذوالفقار علی بھٹو دے حوالے کر دتا گیا۔ بھٹو شہید نے پاکستانی ریاست نوں جمہوری، پارلیمانی تے وفاقی بنیاداں اُتے قائم کیتا۔

ٹُٹی بھجی ریاست اکٹھی کیتی۔ اقتدار سنبھالدے ای 90ہزار قیدیاں چھڈوائے تے 1973دا آئین دتا۔ پاکستانیاں نوں پاسپورٹ دا حق دتا۔

ایسے طرحاں اسلامی کانفرنس سد کے مسلماناں نوں اک تھاں اکٹھا کیتا۔ اپنے خطاب وچ بلاول بھٹو زرداری دا کہنا سی کہ اسلام دہشت گردی تے فرقہ واریت نوں رد کردا اے۔

ریاست دی رٹ تے قانون دی حکمرانی قائم کراں گے۔اوہناں دا کہنا سی کہ جمہوریت ای ملک نوں اک کر سکدی اے۔ نہیں چاہندے الیکشن ملتوی ہون۔اوہناں دا کہنا سی کہ آصف علی زرداری نے سی پیک دی نینہ رکھی تے آئین بحال کیتا۔