رپورٹ شہباز شریف تے رانا ثناء اللہ نوں سزا دوان لئی بتھیری اے: ڈاکٹر طاہر القادری

لاہور(پاکستان پوائنٹ نیوز06۔دسمبر2017ء) پاکستانی عوامی تحریک دے سربراہ ڈاکٹر طاہر القادری نے آکھیا اے کہ ماڈل ٹاؤن دُکھانت دی رپورٹ شہباز شریف تے رانا ثناء اللہ نوں سزا دوان لئی بتھیری اے، کارکن احتجاج لئی تیار رہن، کسے وی ویلے ہنگامی کال دتی جا سکدی اے، کنٹینر وی 24گھنٹے تیار رکھیا جائے، جسٹس باقر نجفی نوں اختیار ملدے تے لُکیا ہویا بندہ ساہمنے آ جاندا۔

اوہ اج ماڈل ٹاؤن وچ جسٹس باقر نجفی کمیشن دی رپورٹ بارے پریس کانفرنس کر رہے سن۔ طاہر القادری نے آکھیا کہ پنجاب حکومت لئی خشخبری اے کہ اجے میں عمرے لئی جا رہیا واں۔

میرا 11دسمبر نوں عمرے دا شیڈول حتمی نہیں اے۔ 10دسمبر نوں عمرہ لئی جا رہیا واں۔ عمرہ نفی عمل اے پر شہیداں لئی انصاف لینا میرا

فرض اے۔

اوہناں نے ہدایت کیتی اے کہ انتظامیہ میرا کنٹینر 24گھنٹے تیار رکھے کسے وی ویلے کارکناں نوں کال دتی جا سکدی اے۔

اوہناں نے آکھیا کہ رپورٹ مل گئی اے۔ رپورٹ دے ہر ورقے اُتے دستخط نیں جہدے توں اصل رپورٹ دی تصدیق ہوندی اے۔ پر اجے تیکر اصل رپورٹ دی کاپی نہیں ملی۔

رپورٹ دا اکھر اکھر پڑھیا اے پر اجے مشورہ کر رہے آں۔اوہناں نے آکھیا کہ قانون دا پڑھیار آں۔ میں اسلامیات وی پڑھی تے قانون دی تعلیم وی حاصل کیتی اے۔

پی ایچ ڈی میری کریمنالوجی وچ اے۔ طاہر القادری نے آکھیا کہ ماڈل ٹاؤن دُکھانت دی رپورٹ شہباز شریف تے رانا ثناء اللہ نوں سزا دوان لئی بتھیری اے۔ پر (ن) لیگ آکھدی رہی کہ وزیر اعلا پنجاب تے رانا ثناء اللہ ملوث نہیں نیں۔