آرمی چیف دی صدارت ہیٹھ کور کمانڈر کانفرنس، سکیورٹی صورتحال دا جائزہ لِتا گیا

راولپنڈی(پاکستان پوائنٹ نیوز05۔دسمبر2017ء) آرمی چیف جنرل قمر جاوید باجوہ دی صدارت ہیٹھ کور کمانڈر کانفرنس ہوئی، کانفرنس وچ ملک نوں پیش اندرونی و بیرونی چیلنجز، آپریشن ردالفساد اُتے پیشرفت تے پاک افغان سرحد اُتے سکیورٹی ودھان دا جائزہ لِتا گیا۔

آئی ایس پی آر مطابق چیف آف آرمی سٹاف جنرل قمر جاوید باجوہ دی صدارت ہیٹھ 206ویں کور کمانڈرز کانفرنس جی ایچ کیو وچ ہوئی۔

آرمی چیف نے کانفرنس دے رلتیاں نوں اپنے غیر ملکی دوریاں تے پاکستان دا دورہ کرن والیاں غیر ملکی شخصیتاں نال ہون والے رابطیاں دے حوالے نال اعتماد وچ لیا۔

کور کمانڈر کانفرنس دے رلتیاں نے ملک دی اندرونی و بیرونی سکیورٹی صورتحال توں وکھ علاقائی ، خاص کر افغانستان دی صورتحال بارے وچار وٹاندرا کیتا۔

اجلاس دے رلتیاں نے ملک دے اندرونی امن دے نال نال خطے تے افغانستان وچ امن لئی کوششاں جاری رکھن دا عزم کیتا۔ عسکری قیادت نے آپریشن ردالفساد اُتے پیشرفت دا وی جائزہ لیا جدکہ پاک افغان سرحد اُتے سکیورٹی ودھان لئی کیتے گئے اقدامات اُتے وی وچار وٹاندرا کیتا گیا۔

کور کمانڈرز کانفرنس دوران پچھلے دناں ای شروع کیتے گئے خشحال بلوچستان پروگرام اُتے وی وچار وٹاندرا کیتاگیا۔