ڈیوٹی نا وخت آتیٹی ٹریفک وارڈن نا موبائل فون نا کاریم اٹ پورو پابندی بنجائی وزیر داخلہ ،چوہدری نثارعلی خان اسلام آباد راولپنڈی نا ٹریفک پولیس ءِ جامع ٹریفک مینجمنٹ پلان تیار کننگ کن 48گھنٹہ نا وخت تس بنجائی وزیر داخلہ چوہدری نثارعلی خان نا دیوان آن تران

اسلام آباد(پاکستان نیوز پوائنٹ 31جنوری2016ء) بنجائی وزیر داخلہ چوہدری نثارعلی خان جاڑ انگا شارتا جتا روڈ آتیا ٹریفک نا دباؤ ءِ کم کننگ کن اسلام آباد و راولپنڈی نا ٹریفک پولیس ءِ اسہ جامع ٹریفک مینجمنٹ پلان اس تیار کننگ کن 48گھنٹہ نا وخت تسنے و پارت کرینے کہ ڈیوٹی نا وخت آتیٹی ٹریفک وارڈن نا موبائل فون نا کاریم اٹ اتنگ آ پورو پابندی مریک۔

سے شنبے آ داڑے دیوان نا ساڑی مروک آتون تران کرے، ہراٹی راولپنڈی نا میئر ہم اوار ئس۔ بنجائی وزیر داخلہ گچین مروک آ نمائندہ و انتظامیہ و پولیس نا سینئر افسر آتون پارے کہ او تینے تینا دفتر آتسکان ہی محدود تخپس بلکن حالیت آتا جاچ خاص کر ٹریفک و سیکورٹی نا حالیت آتے ہُننگ کن جاڑ انگا شار تا ہر جاگہ غا جندی وڑاٹ دورہ ءِ کیر۔

اوپارے کہ دا است ہسونی نا ہیت اسے کہ سینئر افسر آک بیرہ تینا دفتر آتسکان محدود مریرہ و اصل حالیت آتیان بے خبر مریرہ ہراڑآن کیہی معاملہ غاتا سوب لس خلقت ءِ مشکل مریک۔

اوپارت کرے کہ اے آئی جی آپریشن اسلام آباد و آر پی و راولپنڈی نا چاری گری جاڑ انگا شار تے کن 48گھنٹہ نا تہٹی اسہ جامع ٹریفک پلان اس تیار کننگے و تعلقدار چیف کمشنر اسلام آباد و کمشنر راولپنڈی نا کنڈآن ٹریفک پلان نا پین جاچ ءِ ہلنگے۔

ٹریفک خلاف ورزی تا نوٹس ءِ ہلسا وزیر داخلہ پارت کرے کہ ٹریفک کانود آ عملدرآمد ءِ المی جوڑ کننگ اٹی ٹریفک کمامدار

آتا ہچ ءُ سستی اس بایدے مف۔

اوپارے کہ ٹریفک خلاف ورزی نا دروشم اٹی موقع غا جرمانہ کننگے۔ وزیر داخلہ پارے کہ دا اصول آ بے پرخ عملدرآمد کننگے۔

ٹریفک نا ویل آتا مون ءِ توننگ کن ٹریفک مینجمنٹ سٹریٹجی نا چرجوئی ٹی اوپارے کہ بنائی وڑاٹ جاڑ انگا شار تا چار بھلو شاہرات بشمول کشمیر ہائی وے ، ایکسپریس وے، بلیو ایریا، فیض آباد، کنونشن روڈ، مری روڈ، پشاور روڈ، ایئر پورٹ روڈ و راول روڈ آ چکار تخنگے و ٹریفک نا آسانی کن گام گیج اختیار کننگے۔

جاڑ انگا شارتیٹی ایلو روڈ آتے کن ہم ٹریفک پلان ءِ ودیکی تننگے۔ خاص کر کمرشل ایریہ ٹی بے قاعدہ پارکنگ نا بابت وزیرداخلہ ٹریفک کمامدارآتے پارت کرے کہ مقررہ ہند آتیا پارکنگ ءِ المی جوڑ کننگے۔

اوجاڑ انگا شار تا ٹریفک پولیس ءِ حکم تس کہ نادرا نا رابطہ آن جتا بھلا روڈ آتیا ٹریفک نا جاچ ءِ ہلنگے و اودے باقاعدہ جوڑ کننگے و سیف سٹی پروجیکٹ آن فائدہ ہرفنگے۔

او آئی سی ٹی انتظامیہ ءِ ہم پارت کرے کہ فیض آباد و کشمیر ہائی وے آ پوسکن ءُ ٹول پلازہ اس اڈتننگے تانکہ جاڑ انگا شار تیٹی ہردے چلینگوک آ گاڈی تا ہِننگ و بننگ اٹی آسراتی ملے۔

اواڈیالہ روڈ آ ٹریفک نا دباؤ و بے قاعدہ پارکنگ نا ہم نوٹس ءِ ہلک ہرا لس خلقت کن مشکل آتا سوب ءِ۔ وزیر داخلہ چیف ٹریفک آفیسر راولپنڈی ءِ پارت کرے کہ اڈیالہ روڈ آ ٹریفک نا آسانی ءِ المی جوڑ کننگے۔