سرینگر (پاکستان نیوز پوائنٹ 10نومبر2016ء) مقبوضہ کشمیر اچ بھارتی فوجیاں ریاستی دہشت گردی دی تازہ کاروائی دے دوران خمیس کوں ضلع بارہمولہ اچ ہک کشمیری نینگر کوں شہید کر ڈتا ۔ کشمیر میڈیاسروس دے مطابق فوجیاں نینگر کوں ضلع دے علاقے اوڑی اچ رام پور دی جاہ تے محاصرے اتے تلاشی دی ہک پر تشدد کاروائی دے دوران شہید کیتا ۔چھیکڑی اطلاع مل ونجنڑ تئیں علاقے اچ فوجی اپریشن جاری ہا ۔
یاد رہے جو فوجیاں گزریل رات ضلع بارہمولہ دے علاقے رفیع آباد اچ وی ڈو نینگراں کوں شہید کر ڈتا ہا ۔ایندے علاوہ خمیس کوں مسلسل 126ویں ڈینھ وی مقبوضہ کشمیر وادی اچ پوری ہڑتال رہی جیں پاروں معمول زندگی ودھ متاثر ہے ۔کٹھ پتلی انتظامیہ سرینگر اتے بئے سارے وڈے قصبیں اچ آزادی دے حق اچ اتے بھارت دے خلاف مظاہریں کوں روکنڑ سانگے بھارتی فوجیاں تے پولیس اہلکاراں دی ہک وڈی تعداد تعینات کر رکھی ہے ۔
