ڈیووس (پاکستان نیوزپوائنٹ26جنوری2018ء) وزیراعظم شاہد خاقان عباسی نال سوئٹزرلینڈ دے شہر ڈیووس اچ عالمی اقتصادی فورم دے موقع تے میڈ ٹرانک دے چیف ایگزیکٹو آفیسر عمر اشراق گزریل ڈینھ ملاقات کیتی۔ قومی صحت تے خدمات دی وزیر سائرہ افضل تارڑ ، وزیر مملکت اطلاعات تے نشریات مریم اورنگزیب، وزیراعظم دے معاون خصوصی علی جہانگیر صدیقی اتے بئے سینئر حکومتی اہلکار وی ایں موقع تے موجود ہن۔
وزیراعظم میڈ ٹرانک دے چیف ایگزیکٹو آفیسر کوں وزیراعظم صحت پروگرام اتے پورے ملک اچ حفاظتی ٹیکیاں دی کوریج اچ ملنڑ آلیاں کامیابیاں بارے ڈسایا ۔ انہاں صحت دیاں چنگیاں سہولتاں دی فراہمی دے ضمن اچ میڈ ٹرانک کوں پاکستان اچ تربیتی تے تعلیمی مراکز کھولنڑ اتے پاکستانی ہسپتالاں دے نال شراکت داری دی دعوت ڈتی۔ وزیراعظم ولوں صحت عامہ توں متعلق تحقیق تے ترقی توں متعلق مشترکہ منصوبیں دی ضرورت تے وی زور ڈتا گیا۔
ملاقات اچ صحت عامہ دیاں خدمات دی فراہمی بارے مختلف ماڈلز دا وی جائزہ گھدا گیا۔ میڈ ٹرانک دے چیف ایگزیکٹو آفیسروزیراعظم داشکریہ ادا کیتا اتے مستقبل اچ صحت عامہ بارے چیلنجاں اتے نتائج تے مبنی صحت عامہ دیاں خدمات اچ معاونت دی پیشکش کیتی۔ انہاںپاکستان اچ حکومتی اتے نجی سطح تے جدید ترین ہسپتال بنڑاونڑ سانگے سانجھداری دی پیش کش وی کیتی۔ واضح رہوے جو میڈ ٹرانک پوری دنیا اچ صحت عامہ دی چنگی اتے جدید ٹیکنالوجی تے مبنی کمپنی ہے جیرھی دل دی بیماریا، ذیابطیس اتے بئیاں بیماریاں دے انتظام تے انصرام اچ کلیدی خدمات ڈیندی پئی ہے۔
