نیویارک(پاکستان نیوزپوائنٹ09نومبر2017ء) اقوام متحدہ دے ہک سینئر اہلکار سعودی اتحاد نال یمن دی ناکہ بندی ختم کرنڑ دا مطالبہ کریندے ہوئیں آکھیا ہے جو ایندے نال یمن کوں بد ترین قحط دا سامنڑاں ہے ۔اقوام متحدہ دے انسانی حقوق متعلق انڈر سیکرٹری جنرل مارک لوکاک یمن اچ حوثی باغیاں دے خلاف کارروائیاں اچ مصروف اتحاد تے زور ڈتاجو او یمن دی ناکہ بندی ختم کرے۔
اقوام متحدہ دی سلامتی کونسل کوں یمن بارے بریفنگ ڈیونڑ دے بعد صحافیاں نال گالھ بات کریندے ہوئیں مارک لوکاک دا آکھنڑ ہئی جو انھاں کونسل کوں ڈسایا ہے جو جڈاں تئیں یمن دی ناکہ بندی ختم نی کیتی ویندی تاں قحط کائناں مکسی ۔انھاں مزید آکھیا جو دنیااچ گزریل کئی سالاں توں ساریں توں وڈا قحط تھیسی جیرھا جو ہزاراں تے لکھاں لوکاں کوں متاثر کریسی۔ اجوکے ہفتے دے شروع اچ اقوام متحدہ تے ریڈ کراس یمن دی صورتِ حال کو ںتباہ کن قرار ڈتا ہئی ۔انہاں دا آکھنڑ ہے جو یمن اچ 70لکھ لوکاں دی زندگی کوں خطرے دا سامنڑاں ہے ۔
