نیویارک (پاکستان نیوزپوائنٹ27ستمبر2017ء) وزیر خارجہ خواجہ محمد آصف آکھیا ہے جو پاکستان افغانستان دے مسئلے دے پر امن حل سانگے سہولتاں ڈیونڑ تے امریکہ دے نال افغان سرحد تے موثر مینجمنٹ سانگے تیار ہے تاں جو دہشت گرداں دی مداخلت کوں روکیا ونج سگے ۔او گزریل ڈینھ ایشیائی سوسائٹی توں خطاب کریندے پے ہن ۔وزیر خارجہ انہاں ڈینہاں اقوام متحدہ دی جنرل اسمبلی دے 72ویں اجلاس اچ شرکت سانگے نیو یارک اچ ہن ۔
افغانستان دیاں ساریاں بیماریاں سانگے پاکستان کوں قربانی دا بکرا بنڑاونڑ درست کائنی ۔انہاں آکھیا جو پاکستان ماضی اچ افغانستان دے مسئلے دے سیاسی حل سانگے ہر ممکن سہولتاں ڈتیاں ہن جڈاں جو پاکستان اے یقین دہانی کرائی ہے جو ایندی سرزمین کہیں ملک دے خلاف استعمال کائناں کرنڑ ڈیسوں ۔انہاں آکھیا جو پاکستان دے بھارت دے نال تعلقات ،کشمیر دا مسئلہ ،انسداد دہشت گردی سانگے چاتے اقدامات تے ملک دی اقتصادی ترقی دا احاطہ کیتا ۔
انہاں ایشیا سوسائٹی دے ایگزیکٹو نائب صدر ٹام نگورسکی دا خیر مقدم کیتا ۔پروگرام دی میزبانی کولمبیا یونیورسٹی دے جرنلزم دے استاد معروف امریکی صحافی سٹیو کول کیتی ۔خواجہ آصف آکھیا جوپاکستان کہیں وی ملک توں ودھ تے افغانستان اچ امن تے استحکام دی بحالی دا خواہش مند ہے ۔ایندی وجہ نال افغانستان دے نال سرحد تے عدم استحکام تے جھیڑے دا سامنڑاں ہے ۔
اساڈی خواہش ہے جو افغانستان اچ جاری طویل جنگ اپنڑے چھیکڑ کوں پجے ۔ایں مقصد سانگے دلی طور تے اساں پورے تعاون تے ایں ضمن اچ کہیں وی قسم دی مدد سانگے تیار ہوں ۔اساں افغانستان اچ امن چاہندوں ۔انہاں آکھیا جو اتھاں پاکستان دی حدود وڈی واضح ہے جو ایں کیا کرنڑاں ہے ۔اساں افغانستان اچ امن تے سیکورٹی دی ذمے واری نی گھن سگدے ۔اساکوں او کرنڑ کوں آکھیا ویندا پے جیرھا دنیا دے طاقتورتے امیر ملک نی کر سگیے۔
انہاں آکھیا جو موثر مینجمنٹ ہی اصل کنجی ہے ۔افغانستان ولوں سرحد تے مزید کم کرنڑ دی ضرورت ہے جتھاں دہشت گرد عناصر اپنڑی سوکھی پناہ گاہ تلاش کر رکھیا ں ہن ۔انہاں آکھیا جو ایں مسئلے دا عسکری حل نادانی ہے تے اے ناکام تھی گیا ہے ۔انھاں آکھیا جو اساں افغان بارڈر دی موثر مینجمنٹ سانگے امریکہ دے نال رل تے کم کرنڑ چاہندوں ۔ایندے نال نال امن تے عمل اچ سہولتاں وی ڈے سگدوں ۔
انہاں آکھیا جو داعش جیہوجے نویں ابھردے ہوئے چیلنج نال نبڑنڑ سانگے اساں ہم خیال ملکاں اچ ودھ سارے تعاون تے پکی سانجھے داری دے نال انتہا پسندی انہاں تاریک طاقتاں دے خلاف ہک مٹھ تھی تے لڑنڑاں ہوسی ۔ہک سوال دے جواب اچ وزیر خارجہ آکھیا جو پاکستان تے بھارت کوں مذاکرات دی میز تے گھن آونڑ سانگے اقدامات دی ضرورت ہے جتھاں کئی سالاں پرانڑیں کشمیر دے مسئلے جیرھا جو ڈوہیں ملکاں وچال کشیدگی دی بنیادی وجہ ہے سمیت سارے مسئلے دے گالھ تھیوے ۔
انہاں آکھیا جو جڈاں تئیں بھارت دے نال تعلقات چنگے نی تھیندے تاں ہمسائیاں اچ امن نا ممکن ہے ۔پاکستان بھارت دے نال تعلقات معمول تے گھن آونڑ تے سارے جھیڑے گالھ بات دے ذریعے حل کرنڑ سانگے کئی رابطے کیتے تاں جو بھارت ولوں ایں انداز اچ جواب کائنی ڈتا ویندا پیا ۔انہاں آکھیا جو بھارت کشمیر دے مسلے کوں نظر انداز نی کر سگدا نہ ہی او کشمیریاں دے جائزہ حق خود ارادیت سانگے جدوجہد کوں دہشت گردی نال جوڑ سگدا ہے ۔
پاک چین اقتصادی راہداری منصوبہ ایندی پالیسی دا بنیادی عنصر ہے۔ اے منصوبہ ارباں ڈالر دا ہے جیں اچ انفراسٹرکچر ، توانائی، گوادر بندر گاہ اتے صنعتی تعاون شامل ہے۔ ایندے علاوہ بئے علاقائی منصوبے اچ تاپی ، کاسا 1000 اتے پاکستان افغانستان اتے تاجکستان وچال تجارتی سانجھے داری شامل ہے۔ انہاں آکھیا جو پاکستان تے امریکہ وچال دہشت گردی دے خلاف جنگ تے پر تشدد انتہا پسندی عناصر بشمول آئی ایس آئی ایل دا کھنڈاﺅ روکنڑ سانگے رل تے کم کرنڑ تے بہوں ودھ اتفاق ہے ایں طرح افغانستان اچ امن تے استحکام اساڈے باہمی مفاد اچ ہے۔
امریکا بجلی دی گھٹکی نال نبڑنڑ سانگے اساڈی مدد کیتی جڈاں جو پاکستانیاں خاص طور تے تریمتاں کوں فل برائٹ سکالر شپ پروگرام دے تحت یو ایس ایڈ اساڈی مددکریندا پیا ہے ۔امریکی حکومت تے عوام دا شکریہ ادا کریندے ہوئیں وزیر خارجہ خواجہ آصف آکھیا جو امریکہ اچ موجود اساڈے موثر فعال اتے وڈی تعداد اچ موجود پاکستانی ڈوہیں ملکاں واچل پل دا کردار ادا کریندے پے ہن ۔
انہاں آکھیا جو پاکستان اچ سیاحت تے عالمی کرکٹ دی واپسی تھی ہے تے پاکستان دی اقتصادی ترقی بہتر تھی ہے ٹیکس وصولیاں ودھ گیاں ہن ۔ افراط زر کنٹرول اچ ہے اتے غیرملکی زرمبادلہ دے ذخیرے مستحکم اتے سٹاک مارکیٹ فعال ہے ۔ انہاں آکھیا جو اج پاکستان دی اقتصادی ترقی دا دنیا اچ اعتراف کیتا ویندا پیا ہے ۔بلوم برگ جیہوجے وڈے عالمی ادارے پاکستان دی ریکنگ اچ بہتری کوں ظاہر کریندے پن ۔گھریلو تے صنعتی شعبے کوں توانائی دی فراہمی دے شعبے اچ بہتری تھی ہے ۔
