بھوبنشوار (پاکستان پوائنٹ نیوز28نومبر2017ء) 14 ویں عالمی کپ ہاکی ٹورنامنٹ اچ(اج) خمیس کوں ڈو میچاں دا فیصلہ تھیسی۔ تفصیل مطابق 14ویںعالمی کپ ہاکی ٹورنامنٹ بھارتی ریاست اڑسیہ دے دارالحکومت بھوبنشوار اچ شروع تھی گئے۔ میگا ایونٹ اچ کانٹے دار مقابلیاںدا سلسلہ شروع تھی گئے ۔شائقین ہاکی کوں چنگا مقابلے ڈیکھنڑ دا موقع ملسی۔ ٹورنامنٹ اچ (اج) خمیس کوں پول اے دے ڈو میچ کھیڈے ویسن۔
ایں سلسلے اچ پہلا میچ ارجنٹائن اتے سپین دیاں ٹیماں وچال کھیڈیا ویسی جڈاں جوڈوجھا میچ نیوزی لینڈ اتے فرانس دیاں ٹیماں وچال کھیڈیا ویسی۔ میگا ایونٹ اچ ساری دنیا توں 16 ٹیماں ٹائٹل جیتنڑ سانگے ایکشن اچ آوسن۔ میزبان بھارت دے علاوہ پاکستان، ارجنٹائن، نیوزی لینڈ، سپین، فرانس، دفاعی چیمپئن آسٹریلیا، انگلینڈ، آئرلینڈ، چائنا، بیلجیئم، کینیڈا، جنوی افریقہ، ہالینڈ، جرمنی اتے ملائیشیا دیاں ٹیماں ٹورنامنٹ اچ حصہ گھندیاں پن۔
عالمی چیمپئن آسٹریلیا دی ٹیم میگا ایونٹ اچ ٹائٹل دا دفاع کریسی۔ ایں واری میگا ایونٹ اچ چار نویاں ٹیماں کوں شامل کیتا گئے جیندے اچ کینیڈا، فرانس، چین اتے آئرلینڈ شامل ہن۔ ایں توں پہلے عالمی کپ 2014ءاچ 12 ٹیماں شرکت کیتی ہائی۔ 14ویں عالمی کپ اچ شرکت کرنڑ آلیاں 16 ٹیماں کوں چار مختلف پولز اچ تقسیم کیتا گئے۔ پول اے اچ ارجنٹائن، نیوزی لینڈ، سپین اتے فرانس ، پول بی اچ دفاعی چیمپئن آسٹریلیا، انگلینڈ، آئرلینڈ اتے چین کوں رکھیا گئے، پول سی اچ بیلجیئم، میزبان بھارت، کینیڈا اتے جنوبی افریقہ کوں رکھیا گئے جڈاں جو پول سی اچ ہالینڈ، جرمنی، ملائیشیا اتے پاکستان کوں رکھیاگئے ۔
پاکستانی ٹیم اپنڑاں پہلا میچ پہلی دسمبر کوں جرمنی دے خلاف کھیڈسی۔ عالمی کپ اچ شرکت کرنڑ آلیاں 16 ٹیماں وچوں پول میچاں دے بعد 8 ٹیماں میگا ایونٹ دے کوارٹر فائنل مرحلے سانگے کوالیفائی کریسن۔ میگا ایونٹ دا کوارٹر فائنل مرحلہ 12 دسمبر توں شروع تھیسی، کوارٹر فائنل مرحلے دے بعد چار ٹیماں سیمی فائنل سانگے کوالیفائی کریسن۔ عالمی کپ دے ڈوہائیں سیمی فائنل 15 دسمبر کو ںکھیڈے ویسن ۔
میگا ایونٹ دیاں ڈو فائنلسٹ ٹیماں وچال فائنل اتے تریجھی پوزیشن سانگے میچ 16 دسمبر کوں کھیڈیا ویسی۔ واضح رہوے جو پاکستانی ٹیم کوںہاکی دا میگا ایونٹ سبھ توں ودھ چار واری اپنڑے ناں کرچکی ہے، آسٹریلیا اتے ہالینڈ دیاںٹیماںایہ اعزاز ترائے ، ترائے واری جیت چکی ہے۔ جرمنی دی ٹیم ڈو واری جیت چکی جڈاں جو میزبان بھارتی ٹیم ہنڑ تئیں ہک واری ایہ اعزاز جیت سگی ہے۔
