اسلام آباد (پاکستان نیوزپوائنٹ 24اپریل 2018ء) پاکستان سمیت پوری دنیا اچ ملیریا توں بچنڑ داعالمی ڈینھ (اج) بدھ کوں منایاویسی ۔ ایں سال ایں ڈینھ دا موضوع ”ملیریا کوں ہراونڑ سانگے تیار“ ہے۔ عالمی ادارہ صحت دی ملیریا توں متعلق گزریل سال دی سالانہ رپورٹ مطابق پوری دنیا اچ گزریل سال ملیریا دے 216 ملین کیس رجسٹرڈ تھئے جیرھے جو 2016ءدے مقابلے اچ 5 ملین ودھ ہنِ جڈانجو ایں بیماری نال445 000 بندے فوت تھی گئے۔
محکمہ صحت پنجاب دے پبلک ہیلتھ سپیشلسٹ ڈاکٹر اویس بٹ ڈسایا جو پوری دنیا اچ ہر سال500 ملین بندے ملیریا دی بیماری اچ مبتلا تھیندن جنہاں اچ غریب لوکاں دی تعداد 70فیصد تئیںہے۔ایںطرح ترقی پذیر ملکاں خصوصاً ایشیا دے ملکاں سانگے ملیریا ہک ودھدا ہویاخطرہ ہے۔ ہر سال پوری دنیااچ ملیریا نال 10لکھ بندے اتے پاکستان اچ 50 ہزار بندے ہلاکت تھیونڑ سوچنڑ آلی گالھ ہے۔
انہاں ڈسایا جو پوری دنیا اچ ہر30 سیکنڈ دے بعد ہک بال ملیریا دی بیماری دی وجہ فوت تھی ویندے۔ ایں موقع تے محکمہ صحت ، اسلامک میڈیکل ایسوسی ایشن ، پاکستان میڈیکل ایسوسی ایشن، اینٹی ملیریل ایسوسی ایشن اتے کالج آف پیرا میڈکس دے زیر اہتمام ملیریا دے عالمی ڈینھ دے حوالے نال خصوصی کانفرنساں، ورکشاپس، سیمینارز دا وی انعقاد کیتا ویسی ۔تقریبات توں محکمہ صحت دے افسران، طب دے ماہرین سمیت مختلف مکاتب فکر دیاں اہم شخصیات خطاب کریسن، ایندے علاوہ ملیریا کھنڈنڑدیاں وجوہات، ابتدائی علامات ، تشخیص اتے علاج اتے اینکوں روکنڑ سانگے اقدام اتے پرہیز بارے تفصیلی روشنی پاتی ویسی تاں جو عوام کوں ملیریا توں بچاونڑ ممکن تھی سگے ۔
ورلڈ ملیریا ڈے دے موقع تے الیکٹرانک میڈیا خصوصی پروگرام نشر کریسی۔
