سینیٹ اجلاس،پی آئی اے دی تباہی اتے اوندے ذمہ واراں د ا معاملہ متعلقہ کمیٹی کوں بھجوا ڈتا گئے ،ادارے کوں پہلے آلی کار ہک باوقار ادارہ بنڑایا ویسی،شیخ آفتاب احمد

اسلام آباد (پاکستان نیوز پوائنٹ 07ستمبر 2016ء) ایوان بالا دے اجلاس اچ پی آئی اے دی تباہی اتے اوندے ذمہ واراں د ا معاملہ متعلقہ کمیٹی کوں بھجوا ڈتا گئے۔وفاقی وزیر پارلیمانی امور شیخ آفتاب احمد آکھیا جو پی آئی اے کوں بحال کیتا ویسی اتے پہلے آلی کار ہک باوقار ادارہ بنڑایا ویسی،ایں بارے حکومت کم کریندی پئی اے۔بدھ کوں ایوان بالا دے اجلاس اچ سوالاں دے وقفے وچال کرنل (ر) سید طاہر حسین مشہدی دے سوال دے جواب اچ انہاں ڈسایا جو پی آئی اے اچ جیڑھا طیارہ خراب تھیندا ہئی اوں اتھائیں کھڑا ڈتا ویندا ہئی اتے اوندا سامان ڈوجھے جہاز اچ لا ڈتا ویندا ہئی اینویں نو طیارے ناکارہ تھی گئن ۔

پی آئی اے دے ملازماں دے تعداد بہوں ودھ گئی اے،بیروزگاری بہوں اے،انہاں کوں نوکریاں توں کڈھیا نی ونج سگدا،حکومت سنبھالنڑ دے بعد اساں 16ارب فوراً ڈتے تانجو پی آئی اے کوں بحال کیتا ونئے ۔ہک بئی سوال دے جواب اچ انہاں ڈسایا جو 30جون2016تئیں پی آئی اے دے ذمہ 177.41ارب دے قرضے واجب الادا ہن ۔