اسلام آباد (پاکستان نیوزپوائنٹ18جنوری2018ء) مسلم لیگ (ن) دے رکن قومی اسمبلی ڈاکٹر رمیش کمار آکھیے جو ہک پارٹی سربراہ کوں پارلیمنٹ دے بارے اینجھیاںتوہین آمیز گالھیں نئیں کرنڑیاں چاہیداں، شیخ رشیداعلان تاں کیتے بھل او قومی اسمبلی دی سیٹ توں استعفیٰ نہ ڈیسن۔ پارلیمنٹ ہاﺅس دے باہرو میڈیا نال الویندے ہوئیں ڈاکٹر رمیش کمار آکھیے جو طاہر القادری دا شو فلاپ تھیءگئے اتے او ہر ویلھے وَل وٹیندے راہندن، شیخ رشید کوں ہک سیاسی جماعت دا سربراہ ہوونڑ پاروں پارلیمنٹ دے خلاف سخت زبان استعمال نہ کرنڑی چاہید ہی، حیرت اے جو او تنخواہ وی گھند اتے پارلیمنٹ وی نئیں آندے۔
انہاں آکھیے جو کل جلسے اچ صرف عوامی تحریک دے لوک ہن، پیپلزپارٹی اتے پی ٹی آئی دے لوک نئیں آئے۔جیکر پیپلز پارٹی اتے پی ٹی آئی دے لوک آندے تاں آپت اچ بھڑ پوون ہا۔انہاں آکھیے جو شیخ رشید اسمبلی توں استعفے دی گالھ تاں کیتی اے بھل او استعفیٰ اصلوں نہ ڈیسن جیکر انہاں استعفیٰ ڈتا توں اوں ویلھے ہی منظور کرتے نویں الیکشن کرائے ویسن۔
