اسلام آباد (پا کستان نیوزپوائنٹ 16اگست 2016ء) وزارت صحت تے قومی خدمات ولوں قومی اسمبلی کوں ڈسایا گئے جو حکومت تمباکو نوشی روکنڑ دے حوالے نال ڈھگ سارے اقدامات کریندی پئی ہے' صوبیاں وچ وی تمباکو کنٹرول سیل قائم کیتے ویسن۔ منگل کوں قومی اسمبلی دے اجلاس وچ شائستہ پرویز ملک دے نوجواناں وچ تمباکو دے استعمال دے ودھدے ہوئے رجحان توں متعلق توجہ مبذول نوٹس دا جواب ڈیندے ہوئیں قومی صحت تے خدمات دی وزارت دے پارلیمانی سیکرٹری ڈاکٹر درشن آکھیا جو تمباکو نوشی کوں مکاونڑ سانگے آگاہی مہم سانگے فنڈز درکار ہن۔
حکومت ایندی روک تھام سانگے کئی اقدامات کریندی پئی ہے۔ وفاق دی سطح تے تمباکو کنٹرول سیل 2008ء توںقائم ہے۔ صوبائی سطح تے وی ایجھے سیلز قائم کیتے ویسن۔ انہاں آکھیا جو پارلیمنٹ ہائوس وچ تمباکو نوشی کوں سپیکر قومی اسمبلی ہی مکا سگدے ہن۔ انہاں ڈسایا جو تمباکو کو ںکنٹرول کرنڑ سانگے ایکسائز ڈیوٹی دی شرح وچ ودھارا کیتا گیا ہے۔ کرن عمران ڈار آکھیا جو تمباکو نوشی دی روک تھام سانگے آگاہی مہم کوں ہور چنگا کیتا ونجے۔
جڈانجو آسیہ ناز تنولی آکھیا جو قومی اسمبلی سیکرٹریٹ کوں تمباکو نوشی توںپاک زون قرار ڈتا ونجے۔ ایندے جواب وچ پارلیمانی سیکرٹری ڈاکٹر درشن آکھیا جو قومی اسمبلی کوں تمباکو نوشی توں پاک کرنڑ دے حوالے نال سپیکر قومی اسمبلی ای چنگے اقدامات کرنڑ دے مجاز ہن۔ ارکان اسمبلی دے سوالاں دے جواب وچ ڈاکٹر درشن آکھیا جو عوامی جئیں تے سگریٹ پیونڑ تے پابندی عائد کیتی گئی ہے۔
حکومت تمباکو نوشی دی حوصلہ شکنی سانگے ایندے اشتہاراں تے پابندی عائد کیتی ہے۔ ہک حالیہ سروے دے مطابق تمباکو نوشی دے رجحان وچ گھٹکی واقع تھئی ہے۔ انہاں آکھیا جو اساں اسلام آباد کوں تمباکو نوشی توں پاک شہر ڈیکلیئر کیتا ہے۔ڈاکٹر درشن ڈسایا جو پبلک جئیں تے سگریٹ پیونڑ تے جرمانے دی حد ودھا تے ہک لکھ روپے کیتی گئی ہے۔ 18 سال توں گھٹ عمر دے بالاںکوں سگریٹ ویچنڑ تے تے پابندی ہے۔
