اسلام آباد (پاکستان نیوز پوائنٹ 04 اگست 2016ء) سعودی عرب اچ پاکستانی سفارتخانے نوکریاں توں فارغ ترائے کیمپاں اچ راہونڑآلے باقی رقم دے تانگھی ہزاراں پاکستانی مزدوراں کوں فی کس 200ریال دی ادائیگی شروع کرڈتی۔ اے گالھ ریاض اچ پاکستان دے سفیر منظورالحق خمیس کوں '' اے پی پی'' نال ٹیلی فون تے گالھ مہاڑکریندے ہوئیں آکھی۔ پاکستانی سفیر آکھیا جو اساں سیتین،الجزیرہ اتے طائف دے کیمپاں،جتھاں خوراک دی فراہمی ممکن کائناں ہئی ، اچ راہونڑآلیاں پاکستانی مزدوراں اچ کھاونڑپیونڑ کیتے فی کس 200 توں 300 ریال دی نقد ادائیگی شروع کیتی ہے۔
انہاں آکھیا جو سفارتخانہ سعودی کمپنیاں دے 20 کیمپاں اچ راہونڑآلے پاکستانی مزدوراں کوں خوراک دی بلا تعطل فراہمی یقینی بنڑاونڑ کیتے کم کریندی پئی ہے ۔ انہاں آکھیا جو بدھ کوں 700مزدوراں کیتے ترجیحی بنیاداں تے کھانڑاں تیار کرنڑ دا انتظام کیتا گیا ہئی ۔ ایں توں علاوہ پاکستانی مزدوراں کوں بچدی رقم دی ادائیگی کیتے سعودی حکومت ولوں کمپنیوں تے دباو ودھاونڑ دی غرض نال سفارتی کوششاں وی تیز کرڈتیاں گئن۔ پاکستانی سفیر آکھیا جو انہاں بدھ کوں سونگ کیمپ دا دورہ کیتا جتھاں 800دے قریب پاکستانی مزدور وسدے پئے ہن ۔ انہاں آکھیا جو قونصل جنرل اتے ڈپٹی ہیڈ آف مشن وی جدہ اتے دمام دے کیمپاں دے دورے کیتے ہن جتھاں بالترتیب 1000 اتے 1300مزدور راہندے پئے ہن ۔
