اسلام آباد (پاکستان نیوز پوائنٹ 24نومبر2016ء) واپار واري وفاقي وزير انجنيئر خرم دستگير چيو آهي ته گذريل ٽن سالن ۾ عالمي واپار جو ماپو گهٽ ٿيو آهي جنهن جو اثر پاڪستان تي به پيو آهي پر ان جي باوجود پاڪستان پنهنجي روانگي واپار کي برقرار رکيو آهي، آڪٽوبر 2016ع ۾ پاڪستان جي روانگي واپار ۾ 2 سيڪڙو اضافو ٿيو، ان ۾ وڌيڪ بهتري اچي رهي آهي، حڪومت فوڊ پراسيسنگ جي شعبي تي خصوصي ڌيان ڏئي رهي آهي، ملڪ ۾ امن امان ۽ استحڪام سبب معاشي ۽ واپاري صورتحال بهتر ٿي رهي آهي، ڪالهه خميس ڏينهن سينيٽ جي اجلاس ۾ سوالن واري وقفي دوران سينيٽر نزهت صادق جي سوال جي جواب ۾ واپار واري وزير انجنيئر خرم دستگير ٻڌايو ته گذريل ٽن سالن دوران عالمي واپار جو ماپو گهٽ ٿيو، پاڪستان تي به ان جو اثر پيو، آمريڪا جي برآمدات ۽ يورپي يونين، چين سميت سڀني جي روانگي واپار ۾ گهٽتائي آئي، اسان پنهنجي روانگي واپار کي برقرار رکيو آهي، آڪٽوبر 2016ع ۾ پاڪستان جي روانگي واپار ۾ ٻه سيڪڙو واڌ ٿي آهي، آهستي آهستي ان ۾ بهتري اچي رهي آهي.
وزارت اسٽريٽجڪ پاليسي فريم ورڪ ۾ ويليو ايڊيشن، برانڊنگ ۽ رجسٽريشن تي خصوصي ڌيان ڏئي رهي آهي، زرعي مصنوعات جي پراسيسنگ جي لاءِ به مراعتون ڏنيون آهن، ڪپهه جون قيمتون پهرين کان به بهتر آهن، آبادگارن کي فائدو ٿيو آهي، عثمان ڪاڪڙ جي سوال جي جواب ۾ هن چيو ته آمدني واپار ۾ گهٽتائي ناهي ٿي، فرنس آئل سان هلندڙ جنريٽر جيڪي قيمت ۾ وڌيڪ هجڻ سبب هلائڻ ممڪن نه هئا هاڻي هلائڻ ممڪن آهن، اسان چين کان گهڻو ڪچو مال گهرائيندا آهيون، ملڪ ۾ امن امان ۽ استحڪام سبب بهتري اچي رهي آهي، صنعتون پاڻ کي ماڊرنائيز ڪري رهيون آهن ته ان سلسلي کي اسان نه روڪينداسين، پاڪستان جا اهي علائقا جتي ڇڪتاڻ سبب اقتصادي سرگرمي نه هئي هاڻي ٿي رهي آهي، 2017ع ملڪي معيشت کي ترقي ڏيارڻ جي حوالي سان اهم هوندو.