قومي اسيمبلي جي اسپيڪر پاران سينيٽ جي چيئرمين ۽ ڊپٽي چيئرمين جي اليڪشن جي موقعي تي مهمانن واري گئلري ۾ پي ٽي آءِ جي قومي اسيمبلي ميمبر ۽ ڪجهه مهمانن جي وچ ۾ پيش آيل اڻوڻندڙ واقعي تي ميمبرن جي خدشن جو نوٽيس
اسلام آباد (پاکستان نیوزپوائنٹ 13مارچ2018ء) سينيٽ جي چيئرمين ۽ ڊپٽي چيئرمين جي اليڪشن جي موقعي تي مهمانن واري گئلري ۾ پي ٽي آءِ جي قومي اسيمبلي ميمبر ۽ ڪجهه مهمانن جي وچ ۾ پيش آيل اڻوڻندڙ واقعي تي ميمبرن جي خدشن جو نوٽيس وٺندي قومي اسيمبلي جي اسپيڪر چيو آهي ته وزيراعظم ان واقعي تي معافي گهري ورتي آهي ان لاءِ ان تي وڌيڪ ڳالهه نه ڪئي وڃي. اڱاري ڏينهن قومي اسيمبلي ۾ اعتراض واري نقطي تي شيرين مزاري چيو ته اسان جي قومي اسيمبلي ميمبر سان سينيٽ ۾ گذريل ڏينهن جيڪو واقعو پيش آيو اهو افسوسناڪ ۽ جمهوري روايتن جي ابتڙ آهي، اسان ان واقعي جي مذمت ڪريون ٿا، هن چيو ته حڪومت کي صبر ۽ تحمل جو مظاهرو ڪرڻ گهرجي ۽ اپوزيشن جي سينيٽ ۾ فتح کي تسليم ڪيو وڃي، اها ئي جمهوريت ۽ پارليماني نظام جي خوبصورتي آهي، اسپيڪر چيو ته وزيراعظم ان معاملي تي معذرت به ڪري ورتي آهي، طاهره اورنگزيب چيو ته مختلف قومي اسيمبلي ميمبر سينيٽ گئلري ۾ موجود هئا، نعرا هڻندي هڪ ميمبر عبدالله خاقان تي ڪري پيو هو، ڊاڪٽر عذرا فضل سينيٽ جي نئين چونڊيل چيئرمين ۽ ڊپٽي چيئرمين کي مبارڪباد ڏيندي چيو ته پارليامينٽ جي ميمبر ۽ سياستدانن سان ٿيندڙ تازي واقعي جي مذمت ڪريون ٿا، ان تي اسپيڪر چيو ته سياسي اختلاف هڪ طرف پر سمورن پارليامينٽرين تي لازمي آهي ته هو هڪٻئي جي عزت نفس جو خيال رکن .
جڏهن به ڪنهن پارليامينٽرين جي خلاف ڪو واقعو پيش ايندو آهي ته ان جي اسان کي متفقه طور تي مذمت ڪرڻ گهرجي.