اسلام آباد(پاکستان پوائنٹ نیوز01۔فروری2017ء) دوجے ملکاں توں 18ارب توں ودھ پیسے گھلن والے اوورسیز پاکستانیاں نوں 6ویں آدم شماری وچ رلت نہ کرن دافیصلا،اوہ غیر ملکی مِتھے جان گے، آدم شماری لئی ملک بھر وچ اک لکھ 68ہزار 120بلاکس بنائے گئے نیں، آدم شماری وچ ملک وچ رہن والے سارے لوکاں دی گنتی کیتی جانی چاہیدی ، اوہ بھاویں پاکستانی ہون یاں غیر ملکی ہر دارالحکومت وچ 15مارچ توں آدم شماری شروع ہووے گی، ہر ورکر نال اک فوجی جوان تعینات کیتا جائے گا، ضلعیاں نوں فوج نال گل بات کر کے دو حصیاں وچ ونڈیا گیا اے، پاکستان بیورو شماریات دے ماسٹر ٹریٹرز، فوجی افسر تے سکول اُستاداں نوں آدم شماری دے حوالے نال ٹریننگ دے رہے آں۔
چالو مالی سال دے پہلے ست مہینیاں وچ مہنگائی دی شرح 3.85فیصد ریکارڈ کیتی گئی جدکہ جنوری 2016تے جنوری 2017وچ مہنگائی دی شرح 3.66فیصد رہی، جنوری 2017وچ مہنگائی 0.
18فیصد ریکارڈ کیتی گئی۔
تفصیل دے مطابق بدھ نوں اسلام آباد وچ مہینہ وار بریفنگ دیندے ہوئے پاکستان بیورو شماریات دے چیف آصف باجوہ نے آکھیا کہ دوجے ملکاں وچ رہن والے پاکستانیاں نوں آدم شماری وچ شمار نہیں کیتا جائے گا اوہ غیر ملکی مِتھے جان گے، ایس ویلے باہرلے ملکاں وچ 70توں 80لکھ پاکستانی وس رہے نیں جو سالہوار 18ارب ڈالر توں ودھ پیسے پاکستان گھلدے نیں ۔
آصف باجوہ نے آکھیا کہ برصغیر پاک و ہند وچ پہلی آدم شماری 1881وچ ہوئی سی، پاکستان بنن مگروں ہن تک 5وار آدم شماری ہوئی، آئین وچ دس ورھیاں بعد آدم شماری کران دی کوئی شرط نہیں اے، ایہ گل عالمی کنونشن وچ اے کہ دس ورھیاں بعد آدم شماری کرائی جائے۔
اوہناں دا کہنا سی کہ ہر ملک اپنے وسائل نوں ویکھ کے آدم شماری کرواندا اے، پاکستان وچ 6ویں آدم شماری 2008 نوں ہونی سی جو کئی وجھاں پاروں ملتوی کر دِتی گئی پر ہن سی سی آئی نے سپریم کورٹ دے حکم اُتے 15مارچ توں 6ویں آدم شماری کرن دا فیصلا کیتا اے۔
اوہناں نے ہور آکھیا کہ آدم شماری وچ ملک اندر رہن والے ہر بندے نوں گِنیا جائے گا بھاویں اوہ پاکستانی ہووے یاں غیر ملکی، پہلے تن دن گھراں دی نمبرنگ کیتی جائے گی جہدے مگروں دس دِناں وچ اک شمار کنندا تے اک فوجی جوان فارم پر کرن لئی معلومات اکٹھیاں کرن گے جدکہ اک دن بے گھر بندیاں لئی رکھیا گیا اے۔
آصف باجوہ نے آکھیاکہ پاکستان بیورو شماریات ولوں متھے گئے شمار کنندا دو بلاکس کرے گا ملک بھر وچ فوج نال مشورے مگروں کُجھ بلاکس نوں فیز ون وچ رکھیا گیا اے تے کُجھ نوں فیز ٹو وچ، 18مارچ نوں سینسز ریفرنس ڈے ہووے گا جہدے وچ شمار کنندا گھر والیاں توں ہر قسم دیاں معلومات پُچھے گا، پنجاب ، سندھ تے کے پی کے وچ تحصیل جدکہ بلوچستان جی بی تے کے پی وچ اسسٹنٹ کمشنر مِتھے جان گے۔
اوہناں نے آکھیا کہ ملک اندر 1لکھ 68ہزار 120بلاکس بنائے جان گے جہناں وچوں کے پی کے وچ 22ہزار، فاٹا وچ 3ہزار 793، سندھ وچ 38ہزار، بلوچستان وچ 10104، پنجاب وچ 86ہزار، اسلام آباد وچ 1303جدکہ اے جے کے وچ 4023بلاکس بنائے جان گے۔
اوہناں نے ہور آکھیا کہ پاکستان بیورو شماریات دی 785ماسٹر ٹریٹرز نے ٹریننگ مکمل کر لئی اے اسیں فوجی افسراں تے سول سکول ٹیچرز نوں ٹریننگ دیاں گے۔
اوہناں نے ہور آکھیا کہ پاکستان دی تواریخ وچ پہلی وار کُھسریاں نوں آدم شماری وچ شامل کیتا گیا اے۔