اقتصادی راہداری منصوبے نال 7لکھ توں ودھ بندیاں نوں نوکریاں ملن گیاں: ڈاکٹر زبیر اقبال خطے دے سارے ملکاں نوں گیم چینجر پراجیکٹ دا حصہ بنانا چاہندے آں پر منصوبے دے مخالفاں نوں دعوت نہیں دِتی جائے گی: ممبر پلاننگ کمیشن

اسلام آباد(پاکستان پوائنٹ نیوز01۔فروری2017ء) پلاننگ کمیشن دے ممبر ڈاکٹر زبیر اقبال غوری نے آکھیا اے کہ اقتصادی راہداری منصوبے نال 7لکھ توں ودھ بندیاں نوں نوکریاں ملن گیاں۔

تفصیل دے مطابق سرکاری ریڈیو نوں انٹرویو دیندے ہوئے اوہناں نے آکھیا کہ سی پیک منصوبے نال صرف سڑکاں ای نہیں بنن گیاں بلکہ ایہ منصوبا ملک دی سماجی تے اقتصادی ترقی لئی جامع پراجیکٹ اے۔

اوہناں دا کہنا سی کہ سی پیک منصوبے دے تحت 35بلین امریکی ڈالر مالیت دے انرجی پراجیکٹ لائے جا رہے نیں جہدے نال ملک وچ بجلی دی کمی ختم ہو جائے گی۔

زبیر

اقبال دا کہنا سی کہ گوادر وچ ڈونگھی بندرگاہ، انٹر نیشنل ائر پورٹ تے انڈسٹریل زون دی اُساری ایس پراجیکٹ دا ہال مارک اے۔

اوہناں دا کہنا سی کہ گوادر نوں وڈے بین الاقوامی شہر وانگ ہن اپ گریڈ کیتا جا رہیا اے، جتھے ساریاں سہولتاں دِتیاں جان گیاں۔

زبیر ہوراں دا کہنا سی کہ شہر اندر پانی دی کمی نوں پورا کرن لئی دو ڈیم وی بنائے جا رہے نیں۔ اوہناں دا ہور کہنا سی کہ اسیں خطے دے سارے ملکاں نوں ایس گیم چینجر پراجیکٹ دا حصہ بنانا چاہندے آں پر جو ملک ایس منصوبے خلاف نیں اوہناں نوں دعوت نہیں دِتی جائے گی۔