وزیر اعظم محمد نواز شریف دی رہنمائی تے ہدایتاں دے تحت بابائے قوم قائداعظم محمد علی جناح دا جنم دیہاڑ منان لئی تیاریاں بھرپور طریقے نال جاری نیں، ایہ دن پورے جوش و جذبے تے شاندار طریقے نال منایا جائے گا: وزیر مملکت برائے اطلاعات و نشریات مریم اونگزیب
اسلام آباد(پاکستان پوائنٹ نیوز10۔دسمبر2016ء) وزیر مملکت برائے اطلاعات و نشریات و قومی ورثہ مریم اورنگزیب نے آکھیا اے کہ وزیر اعظم محمد نواز شریف دی رہنمائی و ہدایتاں دے تحت بابائے قوم قائداعظم محمد علی جناح دا جنم دیہاڑ منان لئی تیاریاں بھرپور طریقے نال جاری نیں، ایہ دیہاڑ پورے جوش و جذبے تے شاندار طریقے نال منایا جائے گا۔
ایہناں خیالاں دا اظہار اوہناں نے جمعے نوں اسلام آباد وچ اک اعلا سطح دے اجلاس دی صدارت کردے ہوئے کیتا۔ اجلاس نال خطاب کردے ہوئے اوہناں نے آکھیا کہ وزیر اعظم چالو ورھے قائداعظم دے جنم دیہاڑ نوں یادگار طور اُتے منان لئی بڑی دلچسپی لے رہے نیں۔
مریم اورنگزیب نے آکھیا کہ پوری قوم بانی پاکستان نوں بھرپور خراج عقیدت پیش کرے گی، جہناں نے بر صغیر دے مسلماناں نوں ہندوواں تے برطانیا توں آزادی دوائی۔
اوہناں نے آکھیا کہ زندگی دے سارے شعبیاں توں تعلق رکھن والے لوک ایہناں تقریباں وچ حصہ لین گے، اوہناں نے آکھیا کہ ساڈی نوجوناں تے بالاں اُتے اُچیچی توجہ اے کیوں جے عظیم رہنما دے نظریات بارے اگلی نسل نوں آگاہ کرنا ضروری اے۔
اجلاس وچ ایس حوالے نال پچھلے اجلا س دے دوران کیتے گئے فیصلیاں اُتے عملدرآمد دی صورتحال دا وی جائزا لتا گیا۔ وزیر مملکت نے قائد دی جنم دیہاڑ دیاں تقریباں دے سلسلے وچ تیاریاں نوں ہور بہتر بنان لئی انتظامی تے پروسیجرل امور دے حوالے نال موقعے اُتے فیصلے وی کیتے۔
مریم اورنگزیب نے پوری وفاقی حکومت نوںتیاریاں دا حصہ بنان دا فیصلا کیتا تے متعلقا حکام نوں آکھیا کہ ساریاں وزارتاں، ڈویژن تے وفاقی حکومت دے متعلقا محکمیاں نوں ایس ایونٹ نوں کامیاب بنان لئی ضروری ہدایتاں جاری کیتیاں جان۔