پی ٹی آئی چیئرمین عمران خان نے حنیف عباسی دی درخاست اُتے جواب جمع کروا دتا

اسلام آباد(پاکستان پوائنٹ نیوز29۔نومبر۔2016ء) پی ٹی آئی چیئرمین عمران خان نے حنیف عباسی دی اپنے خلاف دائر درخاست اُتے جواب جمع کروا دِتا اے۔

اپنے جواب وچ عمران خان نے حنیف عباسی ولوں لائے گئے ٹیکس چوری تے منی لانڈرنگ بارے سارے الزاماں نوں رَد کر دِتا۔

تفصیل دے مطابق عمران خان ولوں سپریم کورٹ وچ جمع کروائے گئے جواب وچ آکھیا گیا اے کہ حنیف عباسی ولوں منی لانڈرنگ تے ٹیکس چوری دے لائے گئے الزام بے بنیاد تے جھوٹھے نیں۔

عمران خان نے دسیا کہ لندن دا فلیٹ بیرون ملک آمدن نال اک لکھ 17ہزار پاﺅنڈ وچ مُل لیاتے فلیٹ 7لکھ 15ہزار پاﺅنڈز وچ ویچیا۔

اوہناں نے دسیا کہ ٹیکس کٹوتی دے بعد مینوں 6لکھ 90ہزار 307پاﺅنڈز ملے تے طے ہویا کہ لندن فلیٹ دے پیسے جمائما نوں دِتے جان گے۔

اوہناں دا کہنا سی کہ 2002وچ بنی گالا دی زمین 43کروڑ 50لکھ رُپئے دی قسطاں اُتے لئی۔ بنی گالا دی زمین دی پیشگی رقم 65لکھ رُپئے اپنی آمدن توں دِتی۔

لندن فلیٹ دی فروخت وچ دیر اُتے جمائما نے بنی گالا زمین دی رقم دِتی۔ جمائما ولوں بنی گالا دی زمین دے پیسیاں دے دستاویزی ثبوت موجود نیں۔

مارچ 2003وچ لندن فلیٹ دے پیسے جمائما نوں دے دِتے۔جواب وچ اوہناں دا کہنا اے کہ طلاق دے بعد جمائما نے بنی گالا دا گھر خط راہیں گفٹ کر دِتا۔

عمران خان ولوں جواب وچ دسیا گیا کہ ایف بی آر (فیڈرل بورڈ آف ریونیو) نے پچھلے 13ورھیاں توں بنی گالا دی ٹرانزیکشن اُتے اعتراض نہیں کیتا۔

عمران خان نے آکھیا کہ اپنے اثاثیاں بارے کوئی غلط بیانی نہیں کیتی، تن دہاکیاں توں ٹیکس دے رہیاں واں۔