پیپلز پارٹی ولوں صوبیاں دا حصہ فاٹا نوں دین دی مخالفت وفاقی حکومت 18ویں ترمیم تے این ایف سی نال چھیڑ خانی دا خیال ذہنوں کڈھ دیوے، وفاقی حکومت نوں صلاح اے کہ فیصلے کرن توں پہلاں ذرا آئین وی پڑھ لوے:رہنما پیپلز پارٹی
کراچی(پاکستان پوائنٹ نیوز19۔اکتوبر۔2018ء) پاکستان پیپلز پارٹی نے صوبیاں دا حصہ فاٹا نوں دین دی مخالفت کر دتی، چیئرمین پیپلز پارٹی بلاول بھٹو نے آکھیا کہ وفاقی حکومت 18ویں ترمیم تے این ایف سی نال چھیڑ خانی دا خیال ذہنوں کڈھ دیوے، آئین وچ واضح اے کہ این ایف سی ایوارڈ وچ صوبیاں دا حصہ ودھے گا گھٹے گا نہیں۔
تفصیل مطابق پیپلز پارٹی دے چیئرمین بلاول بھٹو دے ترجمان سینیٹر مصطفی نواز کھوکھر نے اپنے بیان وچ آکھیا کہ نویں پاکستان دا خاب وکھان والیاں نے پرانے پاکستان نوں بدحال کر دتا اے۔
پالیسی دی کمی تے ناقص فیصلیاں دی وجہ توں ملک بدترین معاشی بحران دا شکار
اے۔ ترجمان بلاول بھٹو نے آکھیا کہ نویں پاکستان دا خاب لے کے تحریک انصاف دا ساتھ دین والے وی مایوسی دا شکار ہوگئے۔
نویں پاکستان دے نعرے پچھے چلن والیاں دی وڈی گنتی دا گھر واپسی دا سفر شروع ہون والااے۔ ترجمان دا آکھنا سی کہ وفاقی حکومت 18ویں ترمیم تے این ایف سی نال چھیڑ خانی دا خیال ذہنوں کڈھ دیوے۔
صوبیاں دے مالی تے انتظامی اختیار گھٹ کرنا وفاق نال کھلواڑ دے برابر ہوئے گا۔ اوہناں نے آکھیا کہ وفاقی حکومت نوں صلاح اے کہ فیصلے کرن توں پہلاں ذرا آئین وی پڑھ لوے۔
آئین وچ واضح لکھیا اے کہ این ایف سی ایوارڈ وچ صوبیاں دا حصہ ودھے گا گھٹے گا نہیں۔