نہال ہاشمی جیل دی ہوا کھان مگروں وی سبق نہ سکھے 8لکھ فوج اک انچ زمین وی حاصل نہ کر سکی، ایٹم بم صرف وکھان لئی رکھیا ہویا اے:نہال ہاشمی دی ملکی اداریاں اُتے تنقید

کراچی(پاکستان پوائنٹ نیوز19۔اکتوبر۔2018ء) پاکستان مسلم لیگ (ن) دے رہنما نہال ہاشمی جیل دی ہوا کھان مگروں وی نہ سُدھرے۔

نہال ہاشمی نے اک وار فیر ملکی اداریاں نوں تنقید دا نشانہ بنایا اے۔ میڈیا رپورٹس وچ دسیا گیا اے کہ نہال ہاشمی نے کراچی وچ اک تقریب نال خطاب کردے ہوئے آکھیا کہ حکومت اُتے کوئی ہور قبضہ کیتی بیٹھا اے۔

تہاڈے وسائل نال کوئی ہور عیش کر رہیا اے۔ اج ملک وچ دو طرحاں دے لوکاں وچکار جنگ جاری اے۔ اک تے قائداعظم دے اوہ پُتر نیں جو ملک نوں اگانہہ

لیجانا چاہندے نیں تے اک اوہ جو اپنیاں گلاں، حکماں تے ہتھیاراں نال پاکستان دے لوکاں دے سینے چھلنی کرنا چاہندے نیں۔

نہال ہاشمی نے ہور آکھیا کہ ساڈے ملک دی 8لکھ فوج نے اک انچ زمین حاصل نہیں کیتی۔ ایہ صرف وکھان دا ایٹم بم نیں۔ صرف وکھان لئی ایف 16رکھیا ہویا اے ایہنوں استعمال نہیں کر سکدے۔

نہال ہاشمی نے آکھیا کہ اسلحہ وی صرف وکھان لئی رکھیا ہویا اے۔ یاد رہوے کہ ایس توں پہلاں نہال ہاشمی توہین عدالت دے جرم وچ اک مہینے لئی جیل دی ہوا کھا چکے نیں۔