وزیر جیل دا کوٹ لکھپت دا اچانک دورہ:جیل حکام نے ہوم سیکرٹری نوں زبردستی دورے دی شکایت کر دتی

لاہور(پاکستان پوائنٹ نیوز28۔ستمبر۔2018ء) وزیر جیل خانہ جات زوار وڑائچ دا اچانک کوٹ لکھپت دا دورہ، سپرنٹنڈنٹ جیل نے وزیر جیل دے دورے نوں زبردستی جیل وچ گھسنا قرار دے کے لکھتی(تحریری) شکایت کر دتی۔

تفصیل مطابق پاکستان تحریک انصاف دی حکومت بنے اک مہینے توں اُتے دن ہو گئے نیں تے ایس حوالے نال حکومت اپنے 100دناں دے پلان اُتے عملدرآمد لئی کم کر رہی اے۔

ایس سلسلے وچ نویاں نویاں وزارتاں سنبھالن والے وزیراں ولوں کُجھ جذباتی شیواں وی ویکھن نوں لبھ رہیاں نیں۔ ایہدی تازہ مثال پچھلے دیہاڑے وزیر جیل خانہ جات دا

جیل دا زبردستی دورہ وی سی۔

ایس حوالے نال سپرنٹنڈنٹ جیل اعجاز اصغر نے ہوم سیکرٹری نوں خط لکھ کے شکایت کر دتی۔ خط دے متن مطابق وزیر جیل خانہ جات 6بندیاں نال جیل وچ آئے۔

وزیر جیل تے سٹاف نے عملے کولوں جیل دی چابی کھوہ لئی۔ جیہدے مگروں وزیر جیل تلخ کلامی کردے ہوئے موبائل فون لے کے جیل وچ آئے۔

خط وچ ایہ وی لکھیا گیا کہ وزیر تے سٹاف نے عملے دے واکی ٹاکی سیٹ وی جمع کیتے تے نامعلوم بندیاں نوں جیل دی چابی دتی۔ ایس موقعے تے وزیر جیل خانہ جات خطرناک قیدیاں نال غیر قانونی طور اُتے گل بات کر دے رہے۔