ڈیمز فنڈ:اوورسیز پاکستانیاں ولوں صرف 4لکھ پاؤنڈ جمع ہو سکے ضمنی الیکشن لئی صرف اک فیصد اوورسیز پاکستانیاں نے ووٹ رجسٹرڈ کروائے :مشہور پرچاکار

لاہور(پاکستان پوائنٹ نیوز28۔ستمبر۔2018ء) لندن وچ سینئر پرچا کار اظہر جاوید نے آکھیا اے کہ عمران خان دی اپیل اُتے ڈیم فنڈ وچ صرف چار لکھ پاؤنڈ جمع ہوئے، اوورسیز پاکستانی شوکت خانم یاں نم یونیورسٹی نوں فنڈ دین نوں تیار پر دیامیر بھاشا ڈیم لئی کوئی وی وڈی کوشش نہیں کیتی گئی۔

اوہناں نے لندن وچ نجی ٹی وی نال گل بات کردے ہوئے دسیا کہ پچھلے پنج ورھیاں وچ اسیں ویکھیا کہ تبدیلی دی گل ہوندی رہی، ایس تبدیلی نوں سوشل میڈیا راہیں باہرلے ملک وی ویچن دی کوشش کیتی جاندی رہی۔

سوشل میڈیا راہیں پروپیگنڈا کیتا جاندا رہیا۔ اوہدا اثر اوورسیز پاکستانیاں اُتے پیا۔ پی ٹی آئی نوں سوشل میڈیا حد تیکر تے یورپ وچ ڈاڈھی حمایت حاصل اے پر ایتھے پیپلز پارٹی دا اک بہت وڈا سپورٹر اے ۔

مسلم لیگ (ن) تے دوجیاں جماعتاں دے حمایتی وی موجود نیں۔ اوہناں نے

آکھیا کہ ہن 32 حلقیاں وچ ضمنی الیکشن ہون والے نیں۔

اوہناں دا کہنا سی کہ اوورسیز پاکستانیاں نوں ووٹ دا حق دتا گیا پر ضمنی الیکشن لئی صرف اک فیصد اوورسیز پاکستانیاں نے ووٹ رجسٹرڈ کروائے نیں۔

اوہناں دا کہنا سی کہ ایتھوں دے لوکاں نوں بڑی آس سی کہ عمران خان دی حمایت نال پاکستان نواں ہو جائے گا۔ پر ایتھے اوورسیز نوں سبھ توں وڈا جھٹکا وزیر اعلا پنجاب دے چناؤ نال لگا اے۔

ایتھے کٹر قسم دے پی ٹی آئی سپوٹرز وی عثمان بزدار دے چناؤ توں پریشان وکھالی دتے۔ لوکاں دا آکھنا اے کہ عمران خان نوں پی ٹی آئی دے وفادار کارکن وزیر اعلا بنان لئی نظر نہیں آئے؟جدکہ عثمان بزدار تے الیکشن توں صرف دو مہینے پہلے پی ٹی آئی وچ آئے سن فیر کیوں وزیر اعلا بنایا گیا؟پرچا کار دا کہنا سی کہ اوورسیز پاکستانیاں ولوں صرف 4لکھ پاؤنڈ جمع ہو سکے۔