خاور مانیکا دی پولیس نال بدتمیزی تے ڈی پی او دے تبادلے دی انکوائری رپورٹ ساہمنے آ گئی ایڈیشنل آئی جی پنجاب یاں آر پی او نے ڈی پی او پاکپتن نوں خاور مانیکا دے ڈیرے اُتے جا کے معافی منگن دا نہیں آکھیا،خاور مانیکا ولوں پولیس نوں گالھاں کڈھن دا معاملا کسے نتیجے اُتے نہیں اپڑیا:رپورٹ

لاہور(پاکستان پوائنٹ نیوز01۔ستمبر۔2018ء) خاور مانیکا دے پولیس نال مبینہ مندے سلوک تے ڈی پی او پاکپتن دے تبادلے دے معاملے دی انکوائری رپورٹ ساہمنے آ گئی اے۔

میڈیا رپورٹ مطابق ایڈیشنل آئی جی پنجاب یاں آر پی او نے ڈی پی او پاکپتن نوں خاور مانیکا دے ڈیرے اُتے جا کے معافی منگن دا نہیں آکھیا۔

خاور مانیکا ولوں پولیس نوں گالھاں کڈھن دا معاملا کسے نتیجے اُتے نہیں اپڑیا۔ رپورٹ وچ آکھیا گیا کہ سابق ڈی پی او پاکپتن رضوان گوندل نے 2موقف اپنائے۔

خاور مانیکا تے اوہناں دے خاندان نال اک نہیں دو واقعے ہوئے۔ اک واقعہ 5اگست جدکہ دوجا 23اگست نوں ہویا۔ 23اگست نوں خاور مانیکا نوں پولیس پوسٹ اُتے روکن دی کوشش کیتی گئی پر اوہ نہ رُکے۔

پولیس دیاں گڈیاں نے پچھا کرکے خاور مانیکا نوں روکیا۔ خاور مانیکا نے اپنی گڈی دی تلاشی دین توں وی انکار کیتا۔

خاور مانیکا نے رضوان گوندل نال فون اُتے گل کیتی۔ رپورٹ وچ آکھیا گیا کہ خاتون اول بشری بی بی دے سابق شوہر خاور مانیکا تے اوہناں دے گھر والیاں نوں 5اگست تے 23اگست نوں جان بُجھ کے ہراساں کیتے جان دے کوئی ثبوت نہیں ملے۔

رضوان گوندل دے 23اگست نوں وزیر اعلا پنجاب دے دفتر جان دے بیان توں صاف پتا لگدا اے کہ اوہناں دے ایس دورے دا اوس انکوائری نال کوئی تعلق نہیں اے۔

انکوائری رپورٹ وچ آکھیا گیا کہ جے خاور مانیکا ولوں پولیس نوں گالھاں کڈھن دا معاملا ثابت ہو جائے تے بشری بی بی دے سابق شوہر خاور مانیکا خلاف قانونی کارروائی ضرور کیتی جانی چاہیدی۔

چیتے رہوے کہ خاور مانیکا تے اوہناں دے گھر والیاں نوں پولیس ولوں ناکے اُتے روکے جان تے سابق ڈی پی او پاکپتن رضوان گوندل دے تبادلے دے معاملے اُتے چیف جسٹس نے آپ نوٹس لِتا ہویا اے۔