پی ٹی آئی رہنما ولوں شہری اُتے تشدد دا معاملا:سپریم کورٹ نے رکن اسمبلی عمران شاہ نوں سزا سنا دتی عمران شاہ 15دناں وچ 30لکھ رُپئے ڈیمز فنڈ وچ جمع کروان گے:چیف جسٹس

کراچی(پاکستان پوائنٹ نیوز01۔ستمبر۔2018ء) سپریم کورٹ کراچی رجسٹری وچ اج پاکستان تحریک انصاف دے رکن قومی اسمبلی عمران علی شاہ دے شہری اُتے تشدد بارے آپ نوٹس کیس دی سنوائی ہوئی۔

سپریم کورٹ نے شہری نوں سرعام تشدد دا نشانہ بنان اُتے رکن اسمبلی نوں سزا سنا دتی۔ چیف جسٹس آف پاکستان جسٹس ثاقب نثار نے عمران شاہ نوں مخاطب کردے وئے آکھیا کہ تہاڈے نال کیہ سلوک ورتیا جائے؟آپ ای دسو۔

چیف جسٹس نے خفگی دا اظہار کردے ہوئے عمران شاہ نوں آکھیا کہ جیبوں ہتھ کڈھو تے تمیز نال کھڑے ہوو۔ عدالت دا احترام کرنا سکھو۔

ہن دسو ہویا کیہ؟کیہ کیتا جائے؟عمران شاہ نے آکھیا کہ والد تے والدہ نوں گالھاں کڈھن اُتے غصہ آیا۔ چیف جسٹس نے آکھیا کہ داؤد چوہان دی عمر ویکھی؟تہانوں شرم آنی چاہیدی۔

کس پارٹی توں ہو؟ایم پی اے او؟تہاڈے اُتے 62ایف لا دینے آں۔وڈیرے شہری نوں چپیڑ مارن والے نال کیہ ہونا چاہیدا؟چیف جسٹس نے عمران شاہ نال مکالمہ کردے ہوئے آکھیا کہ کسے وڈیرے دے پُتر او؟کون او؟ایہ برداشت اے کہ غصہ آیا تے چپیڑ مار دتی؟عمران علی شاہ نے آکھیا کہ میں معافی چاہنا واں۔

چیف جسٹس نے آکھیا کہ معافی نہیں مقدمہ بھگتو ۔ لوکاں دی عزت تے اوہناں دا احترام کرنا سکھو۔ کوئی خیال کرو لوکاں دی بے عزتی کردے او، سرعام معافی منگو۔

عدالتی حکم اُتے عمران شاہ نے داؤد چوہان کولوں معافی

منگ لی۔ عمران شاہ نے عدالتی کمرے وچ داؤ چوہان نوں گلے وی لایا۔

چیف جسٹس نے آکھیا کہ میں ایس واقعے اُتے بہت دُکھی آں۔ داؤد چوہان دے پُتر نے آکھیا کہ تن سوشل میڈیا ممبراں نے ساڈی بے عزتی کیتی۔

اوہناں نوں گھٹو گھٹ عوامی نمائندے نہیں رہنا چاہیدا۔ داؤد چوہان دے پُتر نے جذباتی ہوندے ہوئے آکھیا کہ پی ٹی آئی سوشل میڈیا ٹیم نے ساڈے خلاف مہم چلائی۔

جیہدے اُتے داؤد چوہان وی عدالتی کمرے وچ رُو پئے۔ چیف جسٹس نے آکھیا کہ میں آپ نوٹس لے کے کسے اُتے احسان نہیں کردا۔

ایس طرحاں دے لوک فرعون بن جاندے نیں۔ ایہناں نوں سابق سکھانا چاہنا واں۔ مثال قائم کراں گے۔ داؤد چوہان نے آکھیاکہ میں اللہ دے ناں اُتے معاف کرنا واں۔

داؤد چوہان نے منگ کیتی عمران شاہ اُتے اک سال لئی وڈی گڈی چلان اُتے پابندی لائی جائے۔ عمران شاہ وی ساڈے وانگ سفر کرن۔

چیف جسٹس نے آکھیاکہ ایہ وڈی گڈی دے بغیر نہیں رہ سکن گے۔ چیف جسٹس نے عمران شاہ کولوں پُچھیا بھئی!رہ لوو گے وڈی گڈی دے بغیر؟عمران علی شاہ نے آکھیا جو حکم تہاڈا۔

جیہدے مگروں چیف جسٹس نے حکم دتا کہ عمران شاہ 15دناں وچ 30لکھ رُپئے ڈیمز فنڈ وچ جمع کروان گے۔ اوہناں نے آکھیا کہ عمران شاہ 1800سی سی تیکر گڈی چلا سکدے نیں۔

داؤد چوہان دے معافی منگن مگروں سپریم کورٹ نے عمران شاہ نوں سزا سُنائی تے آپ نوٹس کیس نبیڑ دتا۔