تعلیمی ادارے گرمیاں دیاں چھٹیاں ہون مگروں وی کھلے رہے پرچیاں دی وجہ توں بالاں نوں چھٹیاں نہیں دتیاں گئیاں: وسیلے

لاہور(پاکستان پوائنٹ نیوز17۔مئی2018ء ) پنجاب دے سرکاری و نجی تعلیمی اداریاں وچ گرمیاں دیاں چھٹیاں 17مئی توں 10اگست تیکر دین دا اعلان کیتا گیا سی پر محکمہ تعلیم ولوں جاری ایس نوٹی فکیشن مگروں وی اج لاہور دے کئی سکولاں دے کُھلن دی اطلاع اے۔

وسیلیاں مطابق سکول انتظامیہ نے پڑھیاراں دے سالہوار(سالانہ) پرچیاں دی وجہ توں اج سکول کھولن دا فیصلا کیتا۔ صوبائی وزیر تعلیم رانا مشہود نے اعلان کیتا سی کہ تعلیمی اداریاں وچ گرمیاں دیاں چھٹیاں 17مئی توں 10اگست تیکر ہون گیاں۔

اوہناں نے ہدایتاں جاری کیتیاں سن کہ کوئی سکول تن مہینیاں دی اکٹھی فیس نہیں لئے گا۔ چیتے رہوے کہ محکمہ تعلیم ولوں نوٹی فکیشن مطابق تعلیمی اداریاں وچ اج توں چھٹیاں شروع ہونیاں سن۔

ایس توں وکھ خیبر پختونخوا وچ وی سرکاری تے نجی تعلیمی اداریاں وچ چھٹیاں دا اعلان کیتا گیا اے۔ محکمہ تعلیم مطابق17مئی توں 13اگست تیکر چھٹیاں ہون گیاں۔

ایس توں پہلاں سندھ حکومت ولوں جاری کیتے گئے اعلان مطابق سندھ بھر وچ گرمیاں دیاں چھٹیاں 14مئی توں 15جولائی تیکر ہون گیاں۔