طالبانک قطبی اوغانستان نا اہم شار قندوز آ کوزہ کن بھلا کارروائی تا بناءِ کریر، شار انا اہم علاقہ غاتیا طالبان تا کوزہ کابل اٹی دھماکہ ٹی اِرا اوغان فوجی کارندہ تپاخت و اسٹ اس ٹھپی
کابل(پاکستان نیوز پوائنٹ 03 اکتوبر2016ء) طالبانک قطبی اوغانستان نا شار قندوز آ کوزہ کن بھلا کارروائی تا بناءِ کرینو و او شار انا اہم علاقہ سیسرا کاتک سرمننگ اٹی سرسہب مسنو، کابل اٹی اسہ دھماکہ اسے ٹی اِرا اوغان فوجی کارندہ تپاخت و اسٹ اس ٹھپی مس۔
اوغان میڈیا نا رداٹ طالبانک تدوک آ دے قندوز شار انا اہم علاقہ غاتیا کوزہ کن مربوط کارروائی کریر۔ قندوز نا کمامدارآک پاریر کہ طالبانک رڑتا دروشم اٹ یک شنبے و دوشنبے نا نیامی نن آن کیہی علاقہ غاتیٹی جلہو آتا بناءِ کریر و دوشنبے نا دے ہم کیہی ہند آتیا جھیڑہ غاک برجاسلیسر۔
کمامدارآک پاریر کہ طالبانک شار انا اہم علاقہ سیسراکاتک سرمننگ اٹی سرسہب مسنو و اوفک گڑاس اہم علاقہ غاتیٹی اہم روٹس آتا کنٹرول ءِ دوئی کرینو۔
قندوز شار آ مسکوہی سال طالبانک کوزہ کریسر و اوکان گڈ اوغان
فورسز آک سخت کوشست آتیان گڈ شار ءِ طالبان تیان خورک کرفیسر۔
کمامدارآک پاریر کہ طالبان و فورسز آتا نیام اٹ جھیڑہ غاتیٹی کیہی بندغ تپاخت و ٹھپی مسنو واہم داسکان گڈیکو کچ انا بارواٹی ہچ پاننگ مفک۔
دارالحکومت کابل اٹی اسہ دھماکہ اسے ٹی اِرااوغان فوجی کارندہ تپاخت و اسٹ اس ٹھپی مس۔ کمامدارآتارداٹ دھماکہ دہ می ضلع ٹی چار قلعہ ضلع ٹی مس و بمب ءِ اسہ سائیکل اسے ٹی تخنگاسس۔
واقعہ ٹی اِرا اوغان فوجی تا تپاخت نا تصدیق کننگانے۔ سویلی صوبہ ہلمند اٹی طالبان تا مربوط جلہو آتیٹی بڑزکوپولیس آفیسر آتا تپاخت نا تصدیق کننگانے۔
کمامدارآتارداٹ ضلع نواء نا پولیس چیف جلہو اٹی خلنگانے۔ صوبہ لوگر اٹی جھیڑہ ٹی اسہ نیاڑی و مسہ طالبان تپاخت کریر۔ خوست اٹی بمب اس تخنگ نا وخت آ دھماکہ آن مسہ طالبان تپاخت و اِرٹ ٹھپی مسنو۔