بنجائی وزیر خزانہ سینیٹر اسحاق ڈار نا ہشت می سارک وزرا ء خزانہ دیوان نا افتتاحی سیشن آن تران

اسلام آباد(پاکستان نیوز پوائنٹ 26اگست 2016ء) بنجائی وزیر خزانہ سینیٹر اسحاق ڈار اومیت ظاہر کرینے کہ علاقائی شون و ڈیہہ نا خلقت آتے بین، نیزگاری و ناخواندگی کون آ ویل آتیان نجات ترفنگ کن سویلی ایشیائی اقتصادی یونین نا جوڑ کننگ نا تغ زوت حقیقت نا دروشم اس ہلیک۔

دا چرجوئی ٹی سارک ملک آتا کنڈآن اسیجائی ہدف آتیا یکسوئی تون توجوہ تروئی مریک۔ او جمعہ آ داڑے ہشت می سارک وزراء خزانہ دیوان نا افتتاحی سیشن آن تران کریکہ۔

وزیراعظم محمد نواز شریف افتتاحی دود انا مہمان خاص ئس وخت اس کہ سارک نا سیکرٹری جنرل ارجن بہادرتھاپا، سارک انا ممبر ملک آتا وزیر خزانہ غاک، بنجائی وزراء و سارک ملک آتا سیکرٹریز خزانہ غاک ہم داوخت آ ساڑی ئسر۔

وزیر خزانہ سارک ملک آتا مندوبین آتا خیرمقدم ءِ کرسا پارے کہ سویلی ایشیانا ڈیہہ ٹی الس نا شون نا گرج آتے پورو کننگ کن بے شمار وارخواہی و لائخی ساڑی ءِ ، دا چرجوئی ٹی اسیجائی حکمت عملی و سارک ملک آتا نیام اٹ اسہ وڑ معاملہ غاتے خلقت آتا اقتصادی و راجی گچینی کن وسیلہ غاتے کاریم اٹ ہتنگ آ مرتکز کننگ نا گرج ءِ۔

اسحاق ڈار پارے کہ قوی حکومت آتے سویلی ایشیائی اقتصادی یونین نا تغ ءِ حقیقت نا دروشم تننگ کن اسیجائی ہدف آتیا یکسوئی اٹ توجوہ تروئی مریک۔

دا چرجوئی ٹی سارک

ملک آتا کنڈآن قومی کہول آ انفرادی کوشست آک سویلی ایشیائی اقتصادی یونین نا مزل نا کنڈآ کمکار ثابت مریرہ۔

اوپارے کہ ننا سروک آک سارک ملک آتا نیام اٹ واپار ، زرکاری، فنانس ، توانائی ، انفراسٹرکچر و رابطہ کاری نا بشخ آتیٹی کمکاری ءِ ودفنگ نا اہمیت آ پدریسہ زورشاغنگ ءُ۔

وزیر خزانہ پارے کہ سارک ملک آتا نیام اٹ نان ٹیرف و ایلو اڑاند آتے مر ، واپار نا آسراتی کن گام گیج، زرکاری کمکاری، مصنوعات آتا حساس مہشون اٹی کمتی، سارک ایگریمنٹ برائے واپار و خذمت، رابطہ کاری ٹی گچینی، توانائی کمکاری ، کسٹمز وڑوڈول ءِ سادہ جوڑ کننگ و زرکاری نا مون آ دننگ و رکھ آن بابت معاہدہ غا کوشست آتے ترند کننگ نا گرج ءِ۔

اسحاق ڈار پارے کہ پاکستان ڈیہہ ءِ بین ، ناخواندگی و ایلو راجی برائی تا چٹفنگ کن جمی علاقائی کوشست آتیٹی تینا کڑد ءِ ادا کننگ ءِ۔

اوپارے کہ پاکستان سارک نا معاملہ غاتیٹی فعال کڑد ادا کرسا اودے اسہ سرسہب علاقائی تنظیم اس اُننگ خواہک و خڑکی علاقائی اتحاد کن قومی کہول آ چندی گام گیج کننگانے۔

او سارک وزراء خزانہ نا ہشت می دیوان نا میزبانی آ حکومت پاکستان نا صفت ءِ کرسا پارے کہ افتتاحی سیشن اٹی وزیراعظم محمد نواز شریف نا شرکت داتنظیم تون پاکستان نا وابستگی و سروک نا عزم انا عکاسءِ۔