پاکستان سویلی ایشیائی ڈیہہ نا اقتصادی شون و ممکنہ علاقائی ہم آہنگی نا تغ ءِ عملی جامہ اس بیرفنگ اٹی کلیدی کڑد ادا کننگ ءِ وزیراعظم محمد نواز شریف نا سارک ملک آتا وزیر خزانہ غاتا ہشت میکو دیوان نا افتتاحی نشست آن تران

اسلام آباد۔(پاکستان نیوز پوائنٹ 26اگست 2016ء) وزیراعظم محمد نوازشریف پارینے کہ پاکستان سویلی ایشیائی ڈیہہ نا اقتصادی شون و ممکنہ علاقائی ہم آہنگی نا تغ ءِ عملی جامہ اس بیرفنگ اٹی کلیدی کڑد ادا کننگ ءِ۔

اوداہیت ءِ جمعہ آ داڑے ہندی ہوٹل اٹی سویلی ایشیائی تنظیم برائے علاقائی کمکار (سارک) ملک آتا وزیر خانہ غاتا ہشت می دیوان نا افتتاحی نشست آن تران کرسا پارے۔

وزیراعظم پارے کہ پاکستان 9 و 10 نومبر آ اسلام آباد اٹی نوزدہ می سارک سروک کانفرنس نا میزبانی نا چاروکی و تنظیم ءِ مون آ دننگ نا خواہندار ءِ۔

اوپارے کہ پاکستان سارک نا پلیٹ فارم نا کمک اٹ علاقائی شون آ تخین تخک انتئے کہ داعلاقہ ٹی امن کن مون آ ہِننگ نا کسر ءِ، پاکستان ڈیہہ نا الس نا اومیت آتے پورو کننگ کن دا رداٹ تینا کڑدءِ ادا کرسا کیک۔

وزیراعظم محمد نواز شریف پارے کہ تنظیم نا پس پردہ سوچ سویلی ایشیاء نا الس نا شرحالی ءِ، ڈیہہ ٹی بے پناہ انسانی و قدرتی وسیلہ ارے، دنیا نا آبادی نا پنچ میکو بشخ دا ڈیہہ ٹی آباد ءِ و علاقہ نا شون اکن دوئی وارخواہی

تیان پبی استفادہ کروئی مرے۔

اوپارے کہ تنظٰم نا راجی منشور مون آہِننگ نا حقی کسر ءِ و ننا ملک دا رداٹ سارک انا غٹ گام گیج آتا مخ تفی ءِ کیک۔

اوجان جوڑی و تعلیم نا بشخ آتیٹی تنظیم نا گیشتر کڑد انا گرج آ زورشاغا۔ نواز شریف اسلام آباد اٹی مندوبین آتا خیرمقدم ءِ کرسا اومیت ظاہر کرے کہ او تنظیم ءِ زیات فعال و گچین جوڑ کننگ کن مفید سفارشات پیش کیک۔

اواومیت ظاہر کرے کہ کسٹمز ، دوہرے ٹیکس ، اقتصادی و مالیاتی کمکاری نا بارواٹی کانفرنس اٹی غوروخوض سارک ءِ زیات بامقصد جوڑ کننگ اٹی کمکار مریک۔

یات سلے کہ وزارتی کانفرنس نا ایجنڈہ ءِ گڈیکو دروشم تننگ کن سارک ملک آتا خزانہ سیکرٹری تا دیوان پنچ شنبے آ اڈ ہلک۔

وزراء خزانہ، سیکرٹریز، تعلقدار اسٹیٹ بینکس نا سروک ، سینئر کمامدار و سفارتکار آک دود اٹی شرکت کریر۔ وزیر خزانہ سینیٹر اسحاق ڈار مندوبین آتا خیرمقدم ءِ کرسا ڈیہہ نا الس نا گچینی و سارک ءِ سرسہب علاقائی تنظیم اس جوڑ کننگ کن گیشتر اشتراک کار نا کوشست آتے سوگوی تننگ آ زورشاغا۔