اسلام آباد (پاکستان نیوز پوائنٹ 7دسمبر2016ء) وزارت مذہبی امور دے زیرانتظام سیرت طیبہ اتے اسلامی تعلیمات دی روشنی وچ بین المذاہب ہم آہنگی دے عنوان نال قومی سیرت کانفرنس 11اتے 12دسمبر کوں لاہور وچ منعقد تھیسی۔ وزارت مذہبی امور دے ذرائع مطابق 11ربیع الاول کوں بادشاہی مسجد وچ نماز مغرب دے بعد عالمی مقابلہ حسن قرأت ہوسی جیندے وچ پاکستان، انڈونیشیا، بنگلہ دیش ، مصر ، ایران اتے مراکش سمیت بئے اسلامی ملکاں توں قراء حضرات شرکت کریسن۔
12ربیع الاول کوں قومی سیرت کانفرنس منعقد تھیسی ۔ کانفرنس وچ ترکی، سعودی عرب ، مراکش ، لیبیا ، اٹلی سمیت دنیا دے بئے ملکاں توں مندوبین شرکت کریسن۔ علاوہ ازیں امام کعبہ اتے پوپ دے نمائندے دی شرکت دے وی قوی امکانات ہن۔ قومی سیرت کانفرنس وچ سیرت دیاں کتاباں، نعت دیاں کتاباں ، سیرت دے مقالیاں تے قومی اتے علاقائی زباناں وچ پہلے ڈوجھے اتے تریجھے نمبر تے آونڑ آلیاں کوں انعام وی ڈتے ویسن۔
