اسلام آباد ۔ 15 نومبر (اے پی پی(قومی اسمبلی دی سٹینڈنگ کمیٹی دفاع کے چیئرمین شیخ روحیل اصغر آکھیا ہے جو پاک چین اقتصادی راہ داری اتے گوادر توں چین دے تجارتی سفر دا آغاز بھارت کوں برداشت نی تھیندا پیا۔ ریڈیو پاکستان نال گالھ مہاڑ کریندے ہوئیں انہاں آکھیا جو بھارت ولوں ہر ڈینھ اشتعال انگیزی دی بنیادی وجوہات ایندے ادرلے حالات دا کنٹرول توں باہر تھیونڑ ہے ،پاکستان ولوں کشمیر دے مسئلے کوں نشابر کرنڑ ،گوادر پورٹ دا فعال تھیونڑ اتے پاک چین اقتصادی راہداری منصوبہ شامل ہن ۔
انہاں آکھیا جو بھارت دیاں اکھیں اچ ساریں توں ودھ پاک چین اقتصادی راہداری کھٹکدی ہے کیوں جو ایں منصوبے نال ساریں توں ودھ پاکستان دے ایں صوبے کوں فائدہ تھیندا ہے جتھاں او ساریں توں ودھ دہشت گردی کریندا پے ۔شیخ روحیل اصغر آکھیا جو بھارت ملک دے اندر موجود مسلماناں کوں ڈھال بنڑیندے ہوئیں اوچھے ہتھکنڈے استعمال کریندا پئے ،کیوں جو اینکوں پتہ ہے جو ودھ سارے پاکستانیاں دیاں اتھاں رشتے داریاں ہن اتے پاکستان مسلماناں دے جانی ضیان دا خیال رکھیندے ہوئیں محتاط انداز اچ کاروائی کریندا ہے تاں مسلماناں دا ودھ جانی ضیان نہ تھیوے ۔
انہاں آکھیا جو پاک فوج بھارتی جارحیت دا ہمیشہ بہادر ی نال جواب ڈتا ہے اساکوں ایندے تے فخر ہے ۔پاکستان دے اندرونی سیاسی حالت دے پاسے اشارہ کریندے ہوئیں انہاں آکھیا جو اساڈیاں سارے سیاسی جماعتاں کوں ملکی ترقی سانگے ہک مٹھ تھیونڑ دی ضرورت ہے ۔امریکہ بھارت تعلقات دے حوالے نال پچھے گے سوال دے جواب اچ انہاں آکھیا جو پاک چین تعلقا ت دے حوالے نال کئی ملکاں اچ تشویش پاتی ویندی ہے اتے امریکہ وی بھارت اچ اپنڑے معاشی مفادات دی خاطر اینکوں چین دے مقابلے اچ کھڑا کرنڑ دی کوشش کریندا پے ایں طرح دنیا دے کئی ملک بھارت دا اصلی چہرہ ڈیکھنڑ دے با وجود اپنڑے اپنڑے مفادات دی خاطر ایندے خلا ف آواز کوں اچا نی کریندے انہاں آکھیا جو چین دی پاکستان اچ سرمایہ کاری مودی کوں ہضم نی تھیندی پئی ایں سانگے او سارے حرکتاں کریندا پئے
