اسلام آباد (پاکستان نیوز پوائنٹ 8نومبر2016ء) پاکستان اتے ترکی وچال آزادانہ تجارت دے معاہدے (ایف ٹی اے) نال پاکستان دیاںبرآمدات کوں 5 ارب ڈالر سالانہ تئیں ودھایا ونج جاسگسی۔ پاکستان بزنس کونسل دی تحقیقی رپورٹ دے مطابق پاکستان اتے ترکی وچال آزادانہ تجارت دے معاہدے تے جاری سال دی چھیکڑ تئیں دستخط کرڈتے ویسن جیندے نال ملکی برآمدات دے فروغ وچ مدد ملسی۔
ڈوہائیں ملکاں دی آپس وچ تجارت دا موجودہ حجم ایندی استعداد توں کڈاہیں گھٹ ہے اتے پاکستان ترکی پھٹی اتے کپڑے دیاں مصنوعات برآمد کریندے ہن جڈانجو ترکی توں مشینری ' بجلی دے آلات ' پلاسٹک ' کیمیکل' آئرن اتے سٹیل سمیت بئیاں مختلف مصنوعات درآمد کریندا ہے۔ رپورٹ دے مطابق معاہدے نال پاکستان دی برآمدات کو ں ودھاونڑ وچ مدد ملسی۔ پاکستان دے مقابلے وچ ترکی دی برآمدات وچ 2.5 گنا تئیں ودھارے دی توقع ہے۔
ایں ویلھے ترکی کوں کیتی ونجڑ آلی برآمدات دا حجم 329 ملین ڈالر دے نیڑے ہے جیکوں 5 ارب ڈالر تئیں ودھایا ونج جا سگدے جڈانجو ترکی دیاں برآمدات وچ 12.8 ارب ڈالر دے ودھارے داامکان ہے ایں ویلھے پاکستان ترکی نال 346 ملین ڈالر دیاں درآمدات کریندا ہے ۔ رپورٹ دے مطابق ایف ٹی اے توں پاکستان دی ترکی کوں برآمدات وچ 22 فیصد توں ودھ ودھارا تھیسی۔ پاک ترک ڈو طرفہ تجارت وچ ودھارے سانگے رپورٹ وچ تجاویز پیش کیتیاں گئیاں ہن جو ایں سلسلے وچ تجارتی رکاوٹاں کوں مکاونڑ اتے ٹیکساں دی موجودہ شرح کوں گھٹ کرنڑ تے توجہ ڈیونڑ دی ضرورت ہے۔
